संपादक : पोपट मारुती मिंड
फलटण (आपलं फलटण) सेवाहक्क दिनानिमित्त फलटण तालुक्यात विविध जनजागृती उपक्रमांचे आयोजन करण्यात आले असून नागरिकांनी या उपक्रमांचा लाभ घ्यावा, असे आवाहन तहसीलदार डॉ. अभिजीत जाधव यांनी केले आहे.
सेवाहक्क दिनाच्या पार्श्वभूमीवर तालुक्यातील सर्व शासकीय कार्यालये तसेच ग्रामपंचायतींमध्ये विशेष सभांचे आयोजन करण्यात येणार आहे. या सभांमध्ये सेवाहक्क अधिनियम २०१५ मधील तरतुदींचे वाचन करून नागरिकांना त्यांच्या हक्कांची माहिती दिली जाणार आहे. यामुळे शासनाच्या विविध सेवा अधिक पारदर्शक आणि वेळेत उपलब्ध व्हाव्यात, हा उद्देश आहे.
याचबरोबर विद्यार्थ्यांसाठी निबंध, वक्तृत्व व चित्रकला स्पर्धांचेही आयोजन करण्यात येणार असून ‘आपले सरकार सेवा केंद्रां’मार्फत विविध सेवा ऑनलाइन पद्धतीने उपलब्ध करून देण्यात येत आहेत.
१ एप्रिल २०२५ ते ३० मार्च २०२६ या कालावधीत तालुक्यात एकूण ६५ हजार ३३५ प्रमाणपत्रांचे वितरण करण्यात आले आहे. यात उत्पन्न, अधिवास, जात, नॉनक्रिमिलियर, अल्पभूधारक, ज्येष्ठ नागरिक तसेच इतर विविध प्रमाणपत्रांचा समावेश आहे. सर्व सेवा निर्धारित कालावधीत देण्यावर प्रशासनाचा भर असल्याचेही यावेळी स्पष्ट करण्यात आले.
नागरिकांना सेवा देताना कोणत्याही प्रकारचा विलंब, अतिरिक्त शुल्क आकारणी किंवा अडचणी येत असल्यास त्यांनी तत्काळ वरिष्ठ अधिकाऱ्यांकडे तक्रार नोंदवावी, असेही आवाहन तहसीलदार डॉ. जाधव यांनी केले आहे.
सेवाहक्क दिनानिमित्त आयोजित या उपक्रमांमध्ये मोठ्या संख्येने सहभागी होऊन शासनाच्या सेवांचा लाभ घ्यावा, असे आवाहन प्रशासनाच्या वतीने करण्यात आले आहे.
