संपादक : पोपट मारुती मिंड
फलटण, दि. २४ : फलटण व माण तालुक्यासाठी नव्याने सुरू करण्यात आलेल्या उपप्रादेशिक परिवहन कार्यालयात सहाय्यक प्रादेशिक परिवहन अधिकारी (एआरटीओ) पदावर सचिन विधाते यांनी पदभार स्वीकारला असून, त्यांच्या नियुक्तीचे अधिकारी, कर्मचारी तसेच फलटणकरांनी उत्साहात स्वागत केले.
परिवहन विभागातील प्रदीर्घ अनुभव असलेले सचिन विधाते यांच्याकडे यापूर्वी सहाय्यक परिवहन आयुक्त, महाराष्ट्र राज्य मुंबई तसेच परिवहन आयुक्त कार्यालयातील परिवहन उपायुक्त (रस्ता सुरक्षा शीर्ष संस्था) या महत्त्वाच्या पदांचा अतिरिक्त कार्यभार होता. तसेच ते पनवेल येथील उपप्रादेशिक परिवहन अधिकारी म्हणूनही कार्यरत होते. पदोन्नतीनंतर त्यांच्यावर फलटण येथील नव्याने सुरू झालेल्या उपप्रादेशिक परिवहन कार्यालयाची जबाबदारी सोपविण्यात आली आहे.
पदभार स्वीकारल्यानंतर कार्यालयात मोटार वाहन निरीक्षक नवाब मुजावर, रेणुका राठोड, गीतांजली काळे, सहाय्यक मोटार वाहन निरीक्षक गौरी रासकर, भारती इंगळे, धनराज दाभाडे, धीरज डोईफोडे, कनिष्ठ लिपिक सागर लाळगे, करणसिंह लेंभे तसेच कार्यकारी जनसंपर्क अधिकारी उमाकांत दीक्षित यांनी त्यांचे स्वागत केले.
यावेळी ओमकार मोटार ड्रायव्हिंग स्कूलचे हनुमंतराव (आप्पा) टेंबरे, नरेंद्र शास्त्री यांच्यासह विविध क्षेत्रांतील नागरिकांनीही विधाते यांना शुभेच्छा देत स्वागत केले.
पुसेगाव (ता. खटाव) येथील रहिवासी असलेले सचिन विधाते यांनी आतापर्यंत शहरी भागात विविध जबाबदाऱ्या यशस्वीपणे सांभाळल्या आहेत. त्यांच्या अनुभवाचा लाभ नव्याने स्थापन झालेल्या फलटण उपप्रादेशिक परिवहन कार्यालयाच्या कार्यक्षमतेत वाढ करण्यासाठी होईल, अशी अपेक्षा व्यक्त केली जात आहे.
फोटो : सहाय्यक प्रादेशिक परिवहन अधिकारी सचिन विधाते यांचे स्वागत करताना कार्यालयातील अधिकारी व कर्मचारी.
