संपादक : पोपट मारुती मिंड
फलटण (आपलं फलटण वृत्तसेवा) : फलटण एज्युकेशन सोसायटी संचलित श्रीमंत शिवाजीराजे उद्यानविद्या महाविद्यालय व कृषी महाविद्यालय, फलटण यांच्या संयुक्त विद्यमाने दि. २९ एप्रिल रोजी ‘मेगा कॅम्पस प्लेसमेंट ड्राईव्ह’चे उत्साहात आयोजन करण्यात आले आहे. सकाळी ९ ते सायंकाळी ५ या वेळेत पार पडणाऱ्या या उपक्रमात एकूण १२ अग्रगण्य कंपन्यांचा सहभाग असून १०२ विद्यार्थ्यांनी मुलाखतींसाठी नोंदणी केली आहे.
या प्लेसमेंट ड्राईव्हचे उद्घाटन फलटण एज्युकेशन सोसायटीचे सचिव तथा जिल्हा परिषद सातारा माजी अध्यक्ष श्रीमंत संजीवराजे नाईक निंबाळकर यांच्या हस्ते होणार आहे. या उपक्रमाच्या माध्यमातून विद्यार्थ्यांना आधुनिक कृषी क्षेत्रातील वाढत्या रोजगार संधींची माहिती मिळणार असून कौशल्याधारित शिक्षणाचे महत्त्व अधोरेखित होणार आहे. तसेच उद्योगक्षेत्राशी थेट संवाद साधण्याची आणि रोजगाराच्या संधी प्राप्त करण्याची सुवर्णसंधी विद्यार्थ्यांना उपलब्ध झाली आहे.
या उपक्रमाच्या यशस्वी आयोजनासाठी श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर व कृषी महाविद्यालय, फलटणचे प्राचार्य डॉ. यू. डी. चव्हाण यांनी विशेष प्रयत्न केले. तसेच प्रा. शिंदे ए. ए. व प्रा. यादव एन. ए. यांनी समन्वयक म्हणून प्रभावी नियोजन व अंमलबजावणी केली.
‘मेगा कॅम्पस प्लेसमेंट ड्राईव्ह’मुळे विद्यार्थ्यांना उद्योगजगताशी थेट संपर्क साधण्याची मौल्यवान संधी मिळाली असून त्यांच्या करिअर घडविण्यासाठी हा उपक्रम अत्यंत उपयुक्त ठरणार असल्याचा विश्वास आयोजकांनी व्यक्त केला आहे.
