संपादक : पोपट मारुती मिंड
फलटण (आपलं फलटण) : येथील दि. यशवंत को-ऑपरेटिव्ह बँक लि., शाखा कराड (जि. सातारा) येथे झालेल्या कथित आर्थिक गैरव्यवहारप्रकरणी सातारा शहर पोलीस ठाण्यात गुन्हा दाखल करण्यात आला असून, संबंधित ठेवीदार व गुंतवणूकदारांनी पुढे येऊन जबाब नोंदवावेत, असे आवाहन पोलिस प्रशासनाने केले आहे.
आर्थिक फसवणुकीबाबत तक्रार प्राप्त झाल्यानंतर पोलिसांनी तत्काळ तपासाची सूत्रे हाती घेतली आहेत. वरिष्ठ अधिकाऱ्यांच्या मार्गदर्शनाखाली या प्रकरणाचा सखोल तपास सुरू असून व्यवहारांचा विस्तार सातारा, सोलापूर, पुणे, सांगली आणि लातूर जिल्ह्यांपर्यंत असल्याची माहिती समोर आली आहे. त्यामुळे कराड शाखेत गुंतवणूक किंवा आर्थिक व्यवहार केलेल्या सर्वांनी आवश्यक कागदपत्रांसह पुढे येणे गरजेचे असल्याचे पोलिसांनी स्पष्ट केले आहे.
मूळ ठेव पावत्या व ठेवींचे पुरावे
पासबुक, व्यवहार नोंदी व बँक स्टेटमेंट्स
बँकेशी झालेला पत्रव्यवहार
ओळखपत्र व आधार कार्डाच्या प्रती
गुंतवणुकीशी संबंधित इतर आवश्यक कागदपत्रे घेऊन गुंतवणूकदाराने पोलीसाची संपर्क साधावा
सदर प्रकरणाच्या तपासासाठी दि. ४ मार्च २०२६ ते दि. ३१ मार्च २०२६ या कालावधीत सकाळी १० ते दुपारी २.३० या वेळेत सातारा पोलिस अधीक्षक कार्यालयात उपस्थित राहण्याचे आवाहन करण्यात आले आहे.
या आर्थिक गैरव्यवहारामुळे फलटणसह परिसरात खळबळ उडाली असून ठेवीदारांमध्ये चिंतेचे वातावरण आहे. दोषींवर कठोर कारवाई करून ठेवीदारांना न्याय मिळावा, अशी मागणी नागरिकांकडून होत आहे.दरम्यान, अफवांवर विश्वास न ठेवता अधिकृत माहितीसाठी थेट पोलिसांशी संपर्क साधावा, असे आवाहन प्रशासनाकडून करण्यात आले आहे.
