सांगली-सातारा विधान परिषद निवडणुकीचा बिगुल१८ जूनला मतदान; २२ जूनला मतमोजणी, आचारसंहिता तात्काळ लागू

फलटण : वृत्तसेवा: सांगली-सातारा स्थानिक स्वराज्य संस्था मतदारसंघाच्या विधान परिषद द्विवार्षिक निवडणुकीचा कार्यक्रम भारत निवडणूक आयोगाने जाहीर केला असून मतदारसंघात तात्काळ प्रभावाने आचारसंहिता लागू करण्यात आली आहे. संबंधित सदस्यांचा कार्यकाळ संपुष्टात आल्याने ही निवडणूक होत असल्याची माहिती जिल्हाधिकारी संतोष पाटील यांनी दिली.
निवडणूक आयोगाच्या नियमानुसार स्थानिक स्वराज्य संस्था मतदारसंघात निवडणूक घेण्यासाठी किमान ७५ टक्के स्थानिक स्वराज्य संस्था कार्यरत असणे तसेच ७५ टक्के मतदार अस्तित्वात असणे आवश्यक असते. यापूर्वी हे निकष पूर्ण न झाल्याने निवडणूक जाहीर करण्यात आली नव्हती. मात्र आता आवश्यक निकष पूर्ण झाल्याची माहिती महाराष्ट्राचे मुख्य निवडणूक अधिकारी यांनी आयोगाला दिल्यानंतर निवडणुकीचा मार्ग मोकळा झाला आहे.
या निवडणुकीसाठी सांगली जिल्हाधिकाऱ्यांची निवडणूक निर्णय अधिकारी म्हणून नियुक्ती करण्यात आली आहे. तसेच सांगली आणि सातारा येथील निवासी उपजिल्हाधिकारी सहाय्यक निवडणूक निर्णय अधिकारी म्हणून काम पाहणार आहेत.
या मतदारसंघातील निवडणुकीत जिल्हा परिषद सदस्य, पंचायत समिती सभापती, नगरपालिका व नगरपंचायतींचे अध्यक्ष तसेच सदस्यांना मतदानाचा अधिकार असणार आहे. एकूण ४७२ मतदार मतदान करणार असून त्यामध्ये नगरपालिका व नगरपंचायतींचे ३९६ तर जिल्हा परिषद मतदार ७६ आहेत.
मतदानासाठी सातारा जिल्ह्यात सातारा, वाई, फलटण, माण-खटाव, कोरेगाव, कराड आणि पाटण या उपविभागीय मुख्यालयांवर एकूण सात मतदान केंद्रे निश्चित करण्यात आली आहेत.
निवडणूक कार्यक्रमानुसार सोमवार, दि. २५ मे २०२६ रोजी अधिसूचना जारी होणार आहे. उमेदवारी अर्ज दाखल करण्याची अंतिम मुदत १ जून असून २ जून रोजी अर्जांची छाननी होईल. ४ जूनपर्यंत उमेदवारी अर्ज मागे घेता येणार आहेत. गुरुवार, दि. १८ जून २०२६ रोजी सकाळी ८ ते दुपारी ४ या वेळेत मतदान होणार असून २२ जून रोजी मतमोजणी केली जाणार आहे. संपूर्ण निवडणूक प्रक्रिया २५ जूनपूर्वी पूर्ण करण्यात येणार आहे.