संपादक : पोपट मारुती मिंड
फलटण (आपलं फलटण) शहरातील सर्वसामान्य नागरिक, विद्यार्थी व महिलांच्या महसूल विभाग तसेच इतर शासकीय विभागांशी संबंधित दैनंदिन प्रश्नांचे त्वरित निराकरण व्हावे आणि विविध शासकीय योजनांचा लाभ एकाच छताखाली मिळावा या उद्देशाने प्रशासनाच्या वतीने फलटण येथे ‘छत्रपती शिवाजी महाराज महसूल समाधान शिबीर अभियान’ आयोजित करण्यात आले आहे. अशी माहिती तहसीलदार डॉ. अभिजित जाधव यांनी प्रसिद्धीपत्रकाद्वारे दिली.
हे शिबीर शुक्रवार, दि. ८ मे रोजी सकाळी ११ वाजता बी.एस.एन.एल. कार्यालय शेजारील नगरपरिषद सभागृह येथे पार पडणार आहे.
या शिबिरामध्ये विविध महत्त्वाच्या सेवा एकाच ठिकाणी उपलब्ध करून देण्यात येणार आहेत. यामध्ये ‘जिवंत ७/१२’ मोहिमेअंतर्गत वारस नोंद, लक्ष्मी मुक्ती, अपाक व एकत्रित नोंदी, ७/१२ व ८अ वाटप, सामाजिक अर्थसहाय्य योजनांसाठी अर्ज स्वीकृती व मंजुरी, तसेच तुकडेबंदी कायद्याविरोधातील व्यवहार व हस्तांतरणासंदर्भातील (अकृषिक जमिनी) गावनिहाय यादी तयार करण्यात येणार आहे.
याशिवाय मंडळ स्तरावरील शाळांमध्ये दाखले शिबिर आयोजित करून विद्यार्थ्यांना आवश्यक दाखले वितरित केले जाणार असून, प्रलंबित फेरफार प्रकरणे निकाली काढण्यावर भर देण्यात येणार आहे. लोकसेवा हक्क कायद्यांतर्गत उत्पन्न, रहिवासी/अधिवास, जात तसेच नॉन-क्रीमीलेअर प्रमाणपत्रांसाठी अर्ज स्वीकारून त्यांचे वितरणही करण्यात येणार आहे.
भोगवटादार वर्ग-२ जमिनींचे वर्ग-१ मध्ये रूपांतर, नवीन अकृषक तरतुदींविषयी मार्गदर्शन, भूसंपादनाशी संबंधित प्रकरणांची दप्तर अद्ययावत करणे, ई-मोजणीद्वारे प्रॉपर्टी कार्ड, नकाशे व वारस नोंदी वाटप, तसेच ‘अग्रीस्टॅक’ (फार्मर आयडी) आणि ‘पीएम किसान’ योजनांअंतर्गत लँड सीडिंग, आधार सीडिंग व ई-केवायसीची कामेही करण्यात येणार आहेत.
महसूल विभागासोबत इतर शासकीय कार्यालयांच्या सेवाही ‘एक खिडकी’ पद्धतीने उपलब्ध करून दिल्या जाणार आहेत.
सदर शिबिरात शहरातील नागरिक, लोकप्रतिनिधी, महिला बचत गट, तसेच युवक मंडळांनी मोठ्या संख्येने सहभागी होऊन या उपक्रमाला यशस्वी करावे, असे आवाहन प्रशासनाच्या वतीने करण्यात आले आहे.
