संपादक : पोपट मारुती मिंड
फलटण ( आपलं फलटण)पत्रकारितेचा पाया सत्य, धैर्य आणि समाजाभिमुखता यावर उभा असतो, याची जाणीव पुन्हा एकदा करून देणारी एक प्रेरणादायी भेट फलटण येथे पार पडली. ज्येष्ठ पत्रकार प्रसन्न जोशी यांची स्थानिक पत्रकारांसोबत ‘ग्रेट भेट’ झाली आणि या भेटीत अनुभव, विचार आणि पत्रकारितेच्या मूल्यांवर हितगुज रंगले.
पत्रकारितेचे जनक मानले जाणारे बालशास्त्री जांभेकर यांच्या विचारांचा वारसा जपत, “रोखठोक आणि निर्भीड पत्रकारिता” कशी असावी यावर प्रसन्न जोशी यांनी मार्गदर्शन केले. ग्रामीण भागातील पत्रकारांनी केवळ बातमी देणारे न राहता समाजाचे सजग प्रहरी बनावे, असे आवाहन त्यांनी यावेळी केले.
या भेटीत त्यांनी पत्रकारितेतील प्रामाणिकपणा, सत्यशोधनाची वृत्ती आणि लोकहिताचा दृष्टिकोन यांचे महत्त्व अधोरेखित केले. बदलत्या काळात डिजिटल माध्यमांचा प्रभाव वाढत असताना, पत्रकारांनी आपल्या मूल्यांशी तडजोड करू नये, असा मौलिक संदेशही त्यांनी दिला.
या प्रसंगी प्रसिद्ध अस्थिरोग तज्ज्ञ डॉ. प्रसाद जोशी यांची विशेष उपस्थिती होती. तसेच विविध माध्यमांतील मान्यवर पत्रकारांनीही या भेटीत सहभाग घेतला. यामध्ये दैनिक पुढारीचे पोपटराव मिंड, आस्था टाईम्सचे संपादक दादासाहेब चोरमले, दैनिक प्रभातचे तथा माजी नगरसेवक अजय माळवे, दैनिक पुण्यनगरीचे फलटण तालुका प्रतिनिधी तसेच देवत्व बेकर्सचे संचालक यशवंत खलाटे पाटील, धैर्य टाईम्सचे संपादक सचिन मोरे, सातारा न्यूजचे प्रतिनिधी राजेंद्र बोंद्रे आणि श्रीहरी सुभाषितचे कार्यकारी संपादक युवा पत्रकार यश सुभाष भांबुरे उपस्थित होते.
ही ‘ग्रेट भेट’ पत्रकारांसाठी केवळ संवादाचा नव्हे, तर प्रेरणा आणि मार्गदर्शनाचा अनमोल ठेवा ठरली. पत्रकारितेच्या मूल्यांना उजाळा देत, समाजाभिमुख पत्रकारितेचा संकल्प अधिक दृढ करण्याचा निर्धार यावेळी व्यक्त करण्यात आला.
