संपादक : पोपट मारुती मिंड
आपलं फलटण प्रतिनिधी
सातारा जिल्ह्यातील ज्येष्ठ पत्रकार, प्राध्यापक, साहित्यप्रेमी व समाजाभिमुख व्यक्तिमत्त्व कै. प्रा. रमेश तुकाराम आढाव यांच्या प्रथम स्मृतिदिनानिमित्त शनिवार, दि. १८ जुलै २०२६ रोजी सकाळी १०.३० ते दुपारी १२.०० या वेळेत महाराजा मंगल कार्यालय, लक्ष्मीनगर, फलटण येथे स्मृतिदिन कार्यक्रमाचे आयोजन करण्यात आले आहे.
कार्यक्रमात सकाळी स्मृतिदिन संस्कार विधी, मान्यवरांचे स्मृतिपर मनोगत, पुष्पांजली अर्पण व त्यानंतर सहभोजनाचे आयोजन करण्यात आले आहे. कै. प्रा. आढाव यांच्या स्मृतींना विनम्र अभिवादन करण्यासाठी नागरिक, पत्रकार, शिक्षक, विद्यार्थी आणि समाजातील सर्व घटकांनी उपस्थित राहावे, असे आवाहन आयोजकांनी केले आहे.
विचारांचा दीपस्तंभ : प्रा. रमेश तुकाराम आढाव
पत्रकारिता, शिक्षण, साहित्य आणि समाजसेवा या चारही क्षेत्रांमध्ये आपल्या कार्याचा अमिट ठसा उमटविणारे प्रा. रमेश तुकाराम आढाव हे सातारा जिल्ह्याचे प्रेरणादायी व्यक्तिमत्त्व होते. गुणवरे येथील साध्या कुटुंबातून पुढे आलेल्या आढाव सरांनी ज्ञान, सामाजिक बांधिलकी आणि लोकहिताची भूमिका आयुष्यभर जपली.
शिक्षक म्हणून त्यांनी असंख्य विद्यार्थ्यांना घडविले, तर पत्रकार म्हणून ग्रामीण प्रश्नांना प्रभावीपणे वाचा फोडली. गेली तीन दशके त्यांनी लोकमत, तरुण भारत यांसारख्या वृत्तपत्रांतून निःपक्ष, अभ्यासपूर्ण आणि जनहिताची पत्रकारिता केली. संपादक, लेखक आणि विचारवंत म्हणून त्यांनी समाजमनाला दिशा देणारे लेखन केले.
पत्रकार संघटनांमध्ये त्यांनी महत्त्वपूर्ण नेतृत्व केले. महाराष्ट्र बहुजन पत्रकार संघाचे सातारा जिल्हाध्यक्ष, फलटण तालुका मराठी पत्रकार परिषदेचे अध्यक्ष, फलटण शहर पत्रकार संघाचे अध्यक्ष तसेच विविध साहित्यिक आणि सामाजिक संस्थांमध्ये त्यांनी जबाबदाऱ्या समर्थपणे सांभाळल्या. भारत सरकारच्या रेल्वे व दूरसंचार सल्लागार समित्यांवर सदस्य म्हणूनही त्यांनी लोकहिताचे प्रश्न प्रभावीपणे मांडले.
समाजकारणातही त्यांचे योगदान तितकेच उल्लेखनीय होते. ग्रामीण शिक्षण, वंचित घटकांचे प्रश्न, सामाजिक प्रबोधन आणि लोकसहभाग या विषयांवर त्यांनी सातत्याने कार्य केले. त्यांच्या नेतृत्वाखाली फलटण तालुका पत्रकार संघाला मिळालेला ‘वसंतराव काणे आदर्श तालुका पत्रकार संघ’ पुरस्कार हा त्यांच्या कार्याचा सन्मान ठरला.
त्यांच्या उल्लेखनीय कार्याची दखल घेत विविध राज्यस्तरीय पत्रकारिता आणि सामाजिक पुरस्कारांनी त्यांचा गौरव करण्यात आला. मात्र, पुरस्कारांपेक्षा समाजाचा विश्वास आणि सहकाऱ्यांचे प्रेम हीच त्यांची खरी संपत्ती होती.
त्यांच्या पश्चात त्यांच्या पत्नी वंदना आढाव, चिरंजीव ऋषिकेश आढाव आणि संपूर्ण कुटुंब त्यांच्या विचारांचा आणि समाजसेवेच्या परंपरेचा वारसा समर्थपणे पुढे नेत आहे.
प्रा. रमेश आढाव हे केवळ एक पत्रकार किंवा शिक्षक नव्हते; ते विचारांचे विद्यापीठ, प्रबोधनाची चळवळ आणि समाजाला दिशा देणारे दीपस्तंभ होते. त्यांच्या कार्याचा आदर्श पुढील पिढ्यांसाठी प्रेरणादायी राहील. त्यांच्या प्रथम स्मृतिदिनानिमित्त त्यांना ‘आपलं फलटण’ परिवाराकडून विनम्र अभिवादन.
