संपादक : पोपट मारुती मिंड
फलटण( आपलं फलटण) येथील आयडियल इंटरनॅशनल स्कूल व ज्युनियर कॉलेजच्या संस्थापिका असलेल्या व
फलटणच्या शैक्षणिक क्षेत्रात उल्लेखनीय कार्य करत आपल्या कर्तृत्वाची छाप उमटविणाऱ्या डॉ. सौ. वैशाली शिंदे यांना नवी दिल्लीत प्रतिष्ठेचा ‘राष्ट्रीय अशोक सन्मान’ नुकताच प्रदान करण्यात आला. दिल्ली येथे भव्य समारंभात हा मानाचा सन्मान त्यांना बहाल करण्यात आला.
शिक्षण क्षेत्रात नाविन्यपूर्ण उपक्रम राबवून विद्यार्थ्यांच्या सर्वांगीण विकासासाठी सातत्याने प्रयत्न करणाऱ्या डॉ. शिंदे यांनी आपल्या कार्यातून वेगळा ठसा उमटवला आहे. त्यांच्या कार्याची दखल घेत हा सन्मान प्रदान करण्यात आला असून, यामुळे फलटणच्या शिरपेचात आणखी एक मानाचा तुरा रोवला गेला आहे.
या सोहळ्यास दिल्लीच्या मुख्यमंत्र्यांसह विविध मान्यवरांची उपस्थिती लाभली होती. सामाजिक व शैक्षणिक क्षेत्रातील योगदानाबद्दल डॉ. शिंदे यांचे सर्व स्तरांतून कौतुक होत असून, फलटण तालुक्यात अभिमानाचे वातावरण निर्माण झाले आहे.
प्रतिक्रिया व्यक्त करताना डॉ. वैशाली शिंदे म्हणाल्या, “हा सन्मान माझ्या एकटीचा नसून माझ्यावर विश्वास ठेवणाऱ्या पालक, शिक्षक आणि विद्यार्थ्यांचा आहे. समाजसेवा व गुणवत्तापूर्ण शिक्षणासाठी मी सदैव कटिबद्ध राहीन.”
या यशानंतर आयडियल इंटरनॅशनल शैक्षणिक संकुलासह फलटण शहर परिसरातील कार्यक्षेत्रात आनंदोत्सवाचे वातावरण असून, संस्थेचे पदाधिकारी, सहकारी शिक्षक , शिक्षकेतर कर्मचारी व शिक्षणप्रेमी नागरिकांनी त्यांचे उत्साहात स्वागत केले. डॉ. शिंदे यांच्या या यशामुळे फलटणच्या शैक्षणिक क्षेत्राचा लौकिक अधिक उंचावला आहे.
