संपादक : पोपट मारुती मिंड
फलटण (आपलं फलटण) : जिद्द, चिकाटी आणि कठोर परिश्रमाच्या जोरावर फलटण तालुक्यातील गिरवी गावच्या सुपुत्राने राज्यभरात यशाचा झेंडा रोवला आहे. महाराष्ट्र लोकसेवा आयोगाच्या (MPSC) नुकत्याच जाहीर झालेल्या निकालात विशाल नारायण वाघ याने पोलीस उपनिरीक्षक (PSI) पदासाठी राज्यात प्रथम क्रमांक पटकावत घवघवीत यश संपादन केले आहे. याचबरोबर राज्य कर निरीक्षक (STI) पदासाठीही त्याची राज्यात २८ व्या क्रमांकाने निवड झाली आहे.
विशाल वाघ याने PSI पदासाठी आवश्यक असलेल्या शारीरिक चाचणीची तयारी फलटण येथील योद्धा करिअर अकॅडमीमध्ये संस्थापक व मार्गदर्शक रणजीत तांबे यांच्या मार्गदर्शनाखाली केली. त्यांच्या मार्गदर्शनाचा या यशात मोठा वाटा असल्याचे विशालने सांगितले.
विशालचे शिक्षण २०२१ साली कोल्हापूर येथील कृषी महाविद्यालयात पूर्ण झाले. त्यानंतर गेल्या चार ते पाच वर्षांपासून त्याने एमपीएससी स्पर्धा परीक्षेची सातत्याने तयारी केली. अनेक अडचणींवर मात करत अखेर त्याने राज्यात प्रथम क्रमांक मिळवत आपल्या कष्टांचे चीज केले.
आपल्या यशाबद्दल बोलताना विशाल म्हणाला, “माझ्या आई-वडिलांनी अत्यंत प्रतिकूल परिस्थितीतही मला शिक्षण दिले. त्यांच्या कष्टामुळेच आज हे यश मिळाले आहे. हे यश मी माझ्या आई-वडिलांना समर्पित करतो.” त्याची बहीण तनश्री हिने देखील राज्यसेवा परीक्षेत निरीक्षण अधिकारी (पुरवठा) पद मिळवून कुटुंबाचा मान उंचावला आहे.
सध्या विशालने राज्य कर निरीक्षक (STI) पदासाठी मुंबई येथील माझगाव येथे प्रशिक्षण पूर्ण केले असून पुढील २० ते २५ दिवसांत त्याचे रुजू होणे अपेक्षित आहे. PSI पदासाठीचे प्रशिक्षण सहा ते सात महिन्यांनंतर होणार असल्याने तोपर्यंत STI पदावर काम करत पुढे पोलीस उपनिरीक्षक म्हणून सेवा करण्याची त्याची इच्छा आहे.
गिरवी गावातील या तरुणाने मिळवलेल्या अभूतपूर्व यशामुळे संपूर्ण फलटण तालुक्यातून त्याचे अभिनंदन होत असून तरुणांसाठी तो प्रेरणादायी ठरला आहे.
