अल्पवयीन मुलीवरील अत्याचार प्रकरणातील आरोपीला २० वर्षांची शिक्षा फलटण न्यायालयाचा निकाल; ग्रामीण पोलिसांच्या प्रभावी तपासाला यश

अल्पवयीन मुलीवरील अत्याचार प्रकरणातील आरोपीला २० वर्षांची शिक्षा
फलटण न्यायालयाचा निकाल; ग्रामीण पोलिसांच्या प्रभावी तपासाला यश
आपलं फलटण प्रतिनिधी : अल्पवयीन मुलीवर लैंगिक अत्याचार केल्याप्रकरणी दोषी ठरलेल्या आरोपीस फलटण येथील जिल्हा व सत्र न्यायालयाने २० वर्षे सक्तमजुरीची शिक्षा व ५०० रुपयांचा दंड ठोठावला आहे. दंड न भरल्यास १५ दिवस साध्या कारावासाची शिक्षा भोगावी लागणार आहे. या निकालामुळे ग्रामीण पोलिसांच्या प्रभावी तपासाला न्यायालयाने दुजोरा दिला आहे.
फलटण ग्रामीण पोलिस ठाण्याच्या हद्दीतील विडणी (ता. फलटण) येथे मे 2018 मध्ये ही घटना घडली होती. याप्रकरणी आरोपी दशरथ बबन बनकर (वय ३८, रा. विडणी, ता. फलटण) याच्याविरुद्ध भारतीय न्याय संहितेच्या संबंधित कलमांसह बालकांचे लैंगिक अत्याचारापासून संरक्षण (पॉक्सो) कायद्यांतर्गत गुन्हा दाखल करण्यात आला होता.
तत्कालीन पोलिस उपनिरीक्षक आर. आर. भोळ यांनी या गुन्ह्याचा तपास करून न्यायालयात दोषारोपपत्र दाखल केले. हा खटला अतिरिक्त जिल्हा व सत्र न्यायाधीश पी. जी. भोसले यांच्या न्यायालयात चालला. सरकार पक्षातर्फे जिल्हा सरकारी वकील भोसले आणि वैभव काटकर यांनी प्रभावी बाजू मांडली. खटल्यादरम्यान एकूण आठ साक्षीदार तपासण्यात आले तसेच परिस्थितीजन्य पुरावे न्यायालयासमोर सादर करण्यात आले.
सादर करण्यात आलेल्या पुराव्यांच्या आधारे न्यायालयाने आरोपीला दोषी ठरवत भारतीय न्याय संहितेच्या कलम ३७६ तसेच पॉक्सो कायद्याच्या कलम ४ व ६ अन्वये २० वर्षे सक्तमजुरी व ५०० रुपयांचा दंड अशी शिक्षा सुनावली.
या प्रकरणाच्या तपासासाठी तत्कालीन पोलिस उपनिरीक्षक आर. आर. भोळ यांच्यासह कोर्ट पैरवी अंमलदार, तपास पथकातील अधिकारी व कर्मचाऱ्यांनी कामकाज पाहिले. पोलिस अधीक्षक निखिल पिंगळे, अपर पोलिस अधीक्षक वैशाली कडूकर, उपविभागीय पोलिस अधिकारी धन्यकुमार गोडसे तसेच फलटण ग्रामीण पोलिस निरीक्षक राजकुमार भुजबळ यांच्या मार्गदर्शनाखाली ही कारवाई पूर्ण करण्यात आली.