श्रीराम कारखान्याच्या भवितव्यावर रामराजेंची निर्णायक सभा; व्हॉट्सअॅप स्टेटसनंतर राजकीय वातावरण तापले

आपलं फलटण वृत्तसेवा : श्रीराम सहकारी साखर कारखान्याच्या भवितव्याबाबत माजी विधान परिषद सभापती आ. श्रीमंत रामराजे नाईक-निंबाळकर यांनी सोशल मीडियावर प्रसिद्ध केलेल्या व्हॉट्सअॅप स्टेटसनंतर तालुक्यात राजकीय आणि सहकार क्षेत्रात चर्चेला उधाण आले आहे. कारखान्याच्या सद्यस्थितीबाबत, पुढील वाटचालीबाबत आणि भविष्यासंदर्भात माहिती देण्यासाठी सोमवार (दि. ६ जुलै) रोजी सकाळी ११.३० वाजता फलटण येथील अनंत मंगल कार्यालयात सभेचे आयोजन करण्यात आल्याची घोषणा या स्टेटसमधून करण्यात आली आहे.

      स्टेटसमध्ये सातत्याने काही विरोधकांकडून सत्तेच्या  माध्यमातून श्रीराम सहकारी साखर कारखाना बंद पाडण्याचा ‘कुटील डाव’ रचला जात असल्याचा गंभीर आरोप करण्यात आला आहे. या पार्श्वभूमीवर कारखान्याच्या भवितव्याबाबत वस्तुस्थिती मांडण्यासाठी आणि पुढील दिशा स्पष्ट करण्यासाठी ही सभा महत्त्वाची ठरणार असल्याचे संकेत देण्यात आले आहेत.

सभेस उपस्थित राहताना प्रत्येक सभासदाने आपला सभासद क्रमांक सोबत आणावा, असे आवाहन करण्यात आले असून कारखान्याच्या भवितव्याच्या दृष्टीने सर्व सभासदांनी मोठ्या संख्येने उपस्थित राहावे, असेही आवाहन करण्यात आले आहे.

       दरम्यान, स्टेटसच्या शेवटी देण्यात आलेला “संघर्ष, संघर्ष, संघर्ष” हा संदेश विशेष चर्चेचा विषय ठरला असून त्यामुळे या सभेकडे केवळ श्रीराम कारखान्याच्या सभासदांचेच नव्हे, तर संपूर्ण फलटण तालुक्याचे लक्ष लागले आहे. कारखान्याच्या भवितव्याबाबत या सभेत कोणती भूमिका मांडली जाते आणि पुढील निर्णय काय होतात, याकडे सहकार क्षेत्राचेही लक्ष लागले आहे.