संपादक : पोपट मारुती मिंड
फलटण ( आपलं फलटण वृत्तसेवा) फलटण तालुक्यातील हणमंतवाडी (आसु) येथे सात वर्षीय चिमुरडीशी गैरवर्तन केल्याप्रकरणी फलटण ग्रामीण पोलिसांनी संशयितास अटक केली असून न्यायालयाने त्याला १४ दिवसांची न्यायालयीन कोठडी सुनावली आहे. या घटनेमुळे परिसरात संताप व्यक्त होत आहे.
पोलिसांनी दिलेल्या माहितीनुसार, गुरुवारी (ता. ५) सकाळी संबंधित चिमुरडीचे आई-वडील शेतमजुरीसाठी बाहेर गेले होते. घरात मुलगी व तिची आजी असे दोघीच होत्या. दुपारी सुमारे एक वाजण्याच्या सुमारास मुलीची आई घरी परतल्यानंतर चिमुरडी रडत तिच्याकडे आली. यावेळी शेजारी राहणाऱ्या व्यक्तीने हाताने खुणावून घरात बोलावले आणि तिच्याशी अयोग्य वर्तन केल्याचे तिने आईला सांगितले.
घटनेची माहिती मिळताच पालकांनी तत्काळ फलटण ग्रामीण पोलिस ठाण्यात धाव घेऊन तक्रार दाखल केली. तक्रारीनुसार, हणमंतवाडी (आसु) येथील तक्रारदाराच्या घराजवळीलच एका व्यक्तीने दुपारी साडेबारा ते एक वाजण्याच्या दरम्यान चिमुरडीला घरात बोलावून तिच्याशी गैरवर्तन केल्याचा आरोप करण्यात आला आहे.
तक्रार प्राप्त होताच फलटण ग्रामीण पोलिसांनी गुन्हा नोंदवून तपासाला सुरुवात केली. बालकांच्या संरक्षणासंदर्भातील लागू कायद्यांनुसार कारवाई करत संशयिताला अटक करण्यात आली. त्यानंतर त्याला न्यायालयासमोर हजर करण्यात आले असता न्यायालयाने १४ दिवसांची न्यायालयीन कोठडी मंजूर केली.
या प्रकरणाचा पुढील तपास फलटण ग्रामीण पोलिसांकडून सुरू असून, घटनेतील सर्व बाबींची सखोल चौकशी करण्यात येत असल्याची माहिती फलटण ग्रामीण पोलिस ठाण्याचे पोलीस निरीक्षक राजकुमार भुजबळ यांनी दिली.
