संपादक : पोपट मारुती मिंड
फलटण (आपलं फलटण) : फलटण तालुक्यातील पंचायत समिती सभापती निवडीदरम्यान घडलेल्या नाट्यमय राजकीय घडामोडींनंतर राष्ट्रवादी काँग्रेसमध्ये मोठी खळबळ उडाली असून फलटण तालुका राष्ट्रवादी काँग्रेसचे तालुकाध्यक्ष शिवरुपराजे खर्डेकर यांनी आपल्या पदाचा राजीनामा दिला आहे. पक्षातील काही सदस्यांनी दाखविलेल्या अविश्वासामुळे हा निर्णय घेतल्याचे त्यांनी स्पष्ट केले आहे.पंचायत समिती सभापती निवडीच्या वेळी राष्ट्रवादी काँग्रेसचे तीन सदस्य अचानक भारतीय जनता पक्षात दाखल झाले. विशेष म्हणजे राष्ट्रवादी काँग्रेसच्या चिन्हावर निवडून आलेली सदस्या सभापतीपदी विराजमान झाली; मात्र निवड प्रक्रियेपूर्वीच त्यांनी भाजपमध्ये प्रवेश केल्याने राष्ट्रवादीच्या स्थानिक नेतृत्वात नाराजीची भावना निर्माण झाली.या घडामोडींमुळे राष्ट्रवादी काँग्रेसच्या तालुका संघटनेत अस्वस्थता निर्माण झाली असून त्याची नैतिक जबाबदारी स्वीकारत तालुकाध्यक्ष शिवरुपराजे खर्डेकर यांनी आपल्या पदाचा राजीनामा दिला. खर्डेकर यांच्या नेतृत्वाखाली राष्ट्रवादी काँग्रेसने फलटण तालुक्यात संघटनात्मक बळ वाढवले होते. त्यांच्या मार्गदर्शनाखाली तालुक्यात आमदारकीची सत्ता टिकविण्यात तसेच फलटण नगरपालिकेत सत्तांतर घडवून आणण्यात पक्षाला यश मिळाले होते. त्यामुळे त्यांच्या राजीनाम्यामुळे तालुक्यातील राष्ट्रवादी काँग्रेसच्या राजकारणात नवीन चर्चा सुरू झाल्या आहेत.दरम्यान, पंचायत समिती सभापती निवडीच्या वेळी घडलेल्या या राजकीय उलथापालथीमुळे तालुक्यातील राजकीय समीकरणेही बदलली आहेत. या पार्श्वभूमीवर खर्डेकर यांच्या राजीनाम्याचा राष्ट्रवादी काँग्रेसच्या संघटनात्मक कामकाजावर आणि आगामी राजकीय घडामोडींवर काय परिणाम होणार, याकडे राजकीय वर्तुळाचे लक्ष लागले आहे.
