संपादक : पोपट मारुती मिंड
फलटण (आपलं फलटण वृत्तसेवा) महाराजा मल्टीस्टेट को-ऑपरेटिव्ह सोसायटीची पंचवार्षिक निवडणूक यंदाही बिनविरोध पार पडली असून विद्यमान चेअरमन दिलीपसिंह भोसले यांच्या नेतृत्वावर सभासदांनी पुन्हा एकदा ठाम विश्वास व्यक्त केला आहे. विशेष म्हणजे संस्थेची सलग चौथी पंचवार्षिक निवडणूक बिनविरोध पार पडण्याची उल्लेखनीय नोंद झाली असून संस्थेच्या कारभाराबद्दल सभासदांमध्ये असलेला विश्वास अधोरेखित झाला आहे.
ही निवडणूक प्रक्रिया निवडणूक निर्णय अधिकारी तथा जिल्हाधिकारी संतोष पाटील यांच्या मार्गदर्शनाखाली पार पडली. यावेळी उपजिल्हाधिकारी कांबळे, नायब तहसीलदार अनिल जाधव तसेच सहाय्यक निबंधक राहुल देशमुख आदी अधिकारी उपस्थित होते. सभासदांच्या उपस्थितीत जिल्हाधिकारी संतोष पाटील यांनी नव्याने निवडून आलेल्या संचालक मंडळाची अधिकृत घोषणा केली.
महाराष्ट्र व कर्नाटक या दोन राज्यांत विस्तारलेली महाराजा मल्टीस्टेट को-ऑपरेटिव्ह सोसायटी सध्या सुमारे ५ हजार सभासदांचे बळ घेऊन कार्यरत आहे. संस्थेची सुमारे ८०० कोटी रुपयांची आर्थिक उलाढाल असून आर्थिक शिस्त, पारदर्शक कारभार आणि काटकसरीचे धोरण यामुळे संस्थेने सहकार क्षेत्रात आपली भक्कम ओळख निर्माण केली आहे.
चेअरमन दिलीपसिंह भोसले आणि व्हाईस चेअरमन रणजितसिंह भोसले यांच्या नेतृत्वाखाली संस्थेने गेल्या काही वर्षांत सातत्याने प्रगतीची वाटचाल केली आहे. सभासद व ठेवीदारांच्या हिताला प्राधान्य देत आर्थिक व्यवहारात पारदर्शकता राखणे, योजनांची प्रभावी अंमलबजावणी करणे आणि सहकार क्षेत्रातील विश्वासार्हता टिकवून ठेवणे या धोरणांमुळे संस्थेची विश्वासार्हता अधिक दृढ झाली आहे. याच पार्श्वभूमीवर सभासदांनी पुन्हा एकदा विद्यमान नेतृत्वावर विश्वास टाकत संचालक मंडळ बिनविरोध निवडून दिले.
सन २०२६-२७ ते २०३१-३२ या कालावधीसाठी निवडून आलेले संचालक मंडळ पुढीलप्रमाणे :
दिलीपसिंह भोसले, रणजितसिंह भोसले, अॅड. सौ. मधुबाला भोसले, सौ. प्रियदर्शनी भोसले, तुषार गांधी, हेमंत फुले, अमोल सस्ते, कुमार भट्टड, विलास रसाळ, दिपराज तावरे व सुभाष आढाव.
नव्याने निवडून आलेल्या संचालक मंडळाकडून आगामी काळात संस्थेचा विस्तार, सभासदांना अधिक चांगल्या सेवा आणि सहकार क्षेत्रात नवे उपक्रम राबविण्याबाबत अपेक्षा व्यक्त केली जात आहे.
