संपादक : पोपट मारुती मिंड
फलटण (आपलं फलटण प्रतिनिधी) : गणेशोत्सवाची भक्ती आणि पर्यावरण संवर्धनाची जबाबदारी यांचा सुंदर संगम घडवत फलटण एज्युकेशन सोसायटीच्या मुधोजी हायस्कूल व ज्युनिअर कॉलेजमध्ये शाडूच्या मातीपासून गणेशमूर्ती तयार करण्याची कार्यशाळा उत्साहात पार पडली. या उपक्रमात १०० विद्यार्थ्यांनी स्वतःच्या हाताने गणेशमूर्ती साकारत आगामी गणेशोत्सवात याच मूर्तींची प्रतिष्ठापना करण्याचा संकल्प केला.
प्रसिद्ध मूर्तिकार राजेश बोथेकर, प्राचार्य वसंतराव शेडगे, उपप्राचार्य सोमनाथ माने, पर्यवेक्षक आर. बी. निंबाळकर व विजय पाटील यांच्या उपस्थितीत हा उपक्रम झाला. गेल्या सहा वर्षांपासून हा पर्यावरणपूरक उपक्रम राबविणारे कलाशिक्षक बापूराव सूर्यवंशी आणि मूर्तिकार राजेश बोथेकर यांनी विद्यार्थ्यांना प्रत्यक्ष प्रात्यक्षिकातून मूर्ती घडविण्याचे मार्गदर्शन केले.
विद्यार्थ्यांनी अत्यंत उत्साहाने शाडूची माती हाताळत विविध आकारांच्या सुबक गणेशमूर्ती तयार केल्या. स्वतःच्या हाताने घडविलेल्या मूर्तीची प्रतिष्ठापना करण्याचा अनुभव विद्यार्थ्यांसाठी आनंददायी ठरणार असून, त्यातून पर्यावरण संवर्धनाचा संदेशही घराघरात पोहोचणार आहे.
यावेळी प्राचार्य वसंतराव शेडगे यांनी सांगितले की, विद्यार्थ्यांवर लहानपणापासूनच पर्यावरण संवर्धनाचे संस्कार होणे गरजेचे आहे. शाडूच्या मातीपासून गणेशमूर्ती तयार करण्याच्या उपक्रमामुळे विद्यार्थ्यांच्या कलागुणांना वाव मिळत असून पर्यावरणाविषयी सामाजिक जाणीवही निर्माण होत आहे.
पर्यवेक्षक विजय पाटील म्हणाले की, शाडूच्या मातीच्या मूर्तींच्या वापरामुळे विसर्जनानंतर होणारे जलप्रदूषण कमी करण्यास मदत होते. विद्यार्थ्यांनी स्वतः तयार केलेल्या मूर्तींमधून समाजाला पर्यावरणपूरक गणेशोत्सवाचा सकारात्मक संदेश मिळणार आहे.
कार्यक्रमाचे सूत्रसंचालन बापूराव सूर्यवंशी व चेतन बोबडे यांनी केले. आभार पर्यवेक्षक आर. बी. निंबाळकर यांनी मानले.
