संपादक : पोपट मारुती मिंड
लखन मोरेच्या नेतृत्वाखाली भारतीय सॉफ्ट हॉकी संघाची दमदार घोडदौड
नेपाळ व भूतानवर एकतर्फी विजय; आता पाकिस्तानविरुद्ध महासंग्राम
फलटण : नेपाळमधील काठमांडू येथे सुरू असलेल्या आंतरराष्ट्रीय सॉफ्ट हॉकी स्पर्धेत भारतीय पुरुष संघाने शानदार कामगिरी करत नेपाळ व भूतान या दोन्ही संघांचा धुव्वा उडवला आहे. भारतीय संघाने आपल्या आक्रमक खेळाच्या जोरावर नेपाळचा ६-० तर भूतानचा ५-० अशा फरकाने पराभव करत स्पर्धेतील निर्विवाद वर्चस्व सिद्ध केले.
भारतीय संघाच्या या दमदार यशामध्ये फलटणचा सुपुत्र लखन मोरे यांचे नेतृत्व विशेष ठरत आहे. भारतीय पुरुष हॉकी संघाचे कर्णधार म्हणून लखन मोरे अत्यंत प्रभावी कामगिरी बजावत असून त्यांच्या नेतृत्वाखाली संघाने सलग विजय मिळवत स्पर्धेत दणदणीत आगेकूच केली आहे. फलटणच्या भूमीतून घडलेला खेळाडू आंतरराष्ट्रीय स्तरावर देशाचे नेतृत्व करत असल्याने फलटणकरांमध्ये अभिमानाचे वातावरण निर्माण झाले आहे.
भारतीय संघाचा पुढील आणि अत्यंत महत्त्वाचा सामना उद्या सकाळी ११ वाजता पारंपरिक प्रतिस्पर्धी पाकिस्तानविरुद्ध रंगणार आहे. या सामन्याकडे क्रीडाप्रेमींचे विशेष लक्ष लागले असून भारताने विजय मिळवून ऐतिहासिक कामगिरी करावी, अशी अपेक्षा व्यक्त होत आहे.
फलटणकरांच्या वतीने भारतीय संघाला तसेच कर्णधार लखन मोरे यांना पुढील सामन्यासाठी मनःपूर्वक शुभेच्छांचा वर्षाव होत आहे. पाकिस्तानवर विजय मिळवत भारतीय संघाने आणखी एक सुवर्णक्षण देशाच्या नावावर करावा, अशी भावना व्यक्त केली जात आहे.
