संपादक : पोपट मारुती मिंड
फलटण(आपलं फलटण प्रतिनिधी)
खेळ हा केवळ विजय-पराजयाचा विषय नसून शिस्त, समर्पण, नेतृत्व आणि देशभक्तीची भावना विकसित करणारे प्रभावी माध्यम आहे. भारतीय सॉफ्ट हॉकी संघाचे कर्णधार लखन नंदकुमार मोरे यांनी आपल्या नेतृत्वगुणांच्या बळावर देशाला अभिमानास्पद यश मिळवून दिले असून त्यांचा प्रवास युवा पिढीसाठी प्रेरणादायी आहे. खेळातील कौशल्य गुणाच्या आधारे त्याने फलटणच्या नावलौकिकातही भर घातला आहे फलटणकरांसाठी ही अभिमानास्पद बाब असल्याचे गौरवोद्गार के. बी. उद्योग समूहाचे संचालक व युवा उद्योजक सचिन यादव यांनी काढले.
नेपाळची राजधानी काठमांडू येथे नुकत्याच पार पडलेल्या पहिल्या साऊथ एशियन सॉफ्ट हॉकी चॅम्पियनशिप स्पर्धेत भारतीय पुरुष सॉफ्ट हॉकी संघाने पाकिस्तानचा अंतिम सामन्यात ७-० असा दणदणीत पराभव करून ऐतिहासिक विजेतेपद पटकावले. या स्पर्धेत भारतीय संघाचे नेतृत्व फलटणचे सुपुत्र लखन नंदकुमार मोरे यांनी यशस्वीपणे केले. त्यांच्या या उल्लेखनीय कामगिरीबद्दल के. बी. उद्योग समूहाच्या वतीने लखनचा आई-वडिलांच्या समवेत सचिन यादव व सौ. सुजाता सचिन यादव यांच्या हस्ते सन्मान करण्यात आला. त्यांच्या क्रीडा क्षेत्रातील योगदानाचे कौतुक करत भविष्यातील वाटचालीसाठी शुभेच्छा देण्यात आल्या. भारतीय संघाच्या या ऐतिहासिक यशामुळे देशासह महाराष्ट्राच्या शिरपेचात मानाचा तुरा रोवला गेला असून लखन मोरे यांच्या नेतृत्वाचे सर्व स्तरांतून कौतुक होत आहे.
के. बी. उद्योग समूह सामाजिक बांधिलकी जपत शिक्षण, कला, संस्कृती, सामाजिक कार्य आणि क्रीडा क्षेत्रातील गुणवंतांना सातत्याने प्रोत्साहन देत आहे. विविध खेळांमध्ये उल्लेखनीय कामगिरी करणाऱ्या खेळाडूंना आर्थिक व नैतिक पाठबळ देऊन त्यांचा उत्साह वाढविण्याचे कार्यही समूहामार्फत केले जाते.
दरम्यान, पूर्णपणे भारतात विकसित झालेल्या सॉफ्ट हॉकी या खेळाची लोकप्रियता दक्षिण आशियाई देशांमध्ये झपाट्याने वाढत आहे. पहिल्याच साऊथ एशियन चॅम्पियनशिपमध्ये भारताने विजेतेपद पटकावून या खेळातील आपले वर्चस्व अधोरेखित केले आहे.
कृतज्ञता
भारतीय सॉफ्ट हॉकी संघाचे कर्णधार लखन नंदकुमार मोरे यांनी आपल्या सत्काराबद्दल के. बी. उद्योग समूह आणि युवा उद्योजक सचिन यादव यांचे आभार मानले. “राष्ट्रीय स्तरावरील यशानंतर आपल्या मातीतील आणि आपल्या माणसांकडून मिळालेला हा सन्मान माझ्यासाठी अत्यंत भावनिक आणि अविस्मरणीय आहे. हा घरचा सत्कार मला भविष्यात आणखी जोमाने देशासाठी खेळण्याची प्रेरणा देणारा ठरेल,” अशा भावना मोरे यांनी व्यक्त केल्या.
