संपादक : पोपट मारुती मिंड
फलटण (आपलं फलटण) सातारा जिल्ह्याच्या कुस्ती परंपरेला नवा सुवर्णस्पर्श देणाऱ्या हिंदकेसरी पैलवान महेंद्र गायकवाड यांचा फलटण नगरपालिकेत नगराध्यक्ष समशेरसिंह नाईक-निंबाळकर यांच्या हस्ते उत्साहपूर्ण आणि दिमाखदार सत्कार करण्यात आला. सातारा येथे नुकत्याच पार पडलेल्या हिंदकेसरी स्पर्धेत मानाचा हिंदकेसरी किताब पटकावल्यानंतर सातारा जिल्ह्यात प्रथमच फलटणमध्ये झालेल्या या सत्कार सोहळ्यामुळे कुस्तीप्रेमींमध्ये उत्साहाचे वातावरण निर्माण झाले. “फलटणची कुस्ती परंपरा राज्यात आदर्शवत असून या क्षेत्रातील खेळाडूंना सर्वतोपरी सहकार्य केले जाईल,” अशी ग्वाही नगराध्यक्षांनी देत हिंदकेसरी गायकवाड यांच्या यशाचे भरभरून कौतुक केले.
यावेळी बोलताना नगराध्यक्ष समशेरसिंह ना.निंबाळकर यांनी सांगितले की, फलटण तालुका हा परंपरेने मर्दानी खेळांचा वारसा जपणारा तालुका आहे. संस्थान काळापासून येथे कुस्ती परंपरा जोपासली जातेय. हिंदकेसरी महेंद्र गायकवाड यांचे यश संपूर्ण सातारा जिल्ह्यासाठी अभिमानाची बाब आहे. माजी खासदार रणजितसिंह नाईक-निंबाळकर यांच्या माध्यमातून भारतीय जनता पार्टीकडून मुख्यमंत्री देवेंद्र फडणवीस यांच्याकडे त्यांच्या पुढील वाटचालीसाठी आवश्यक ते सहकार्य करण्याचा विश्वास दिला
सत्काराला उत्तर देताना हिंदकेसरी महेंद्र गायकवाड भावुक झाले. “सातारा जिल्ह्याने मला नेहमीच प्रेम, पाठिंबा आणि प्रेरणा दिली. माझी पहिली महाराष्ट्र केसरी स्पर्धाही साताऱ्यातूनच झाली होती. त्या वेळीही नागरिकांनी मला मोठा आधार दिला. हिंदकेसरी किताब पटकावल्यानंतर फलटणमध्ये माझा पहिला सत्कार होतोय याचा मला मनस्वी आनंद होत आहे. आता यापुढे अधिक मेहनत घेऊन भारताला ऑलिंपिकमध्ये पदक मिळवून देण्याचे माझे स्वप्न आहे,” अशी भावना त्यांनी व्यक्त केली. दरम्यान कुस्ती क्षेत्राकडे महाराष्ट्र शासनाने अधिक लक्ष देऊन गावोगावी पूर्वीप्रमाणे नव्या तालमी उभारण्यासाठी शासनाने सहकार्य करावे अशी अपेक्षा त्यांनी व्यक्त केली.
यावेळी उपमहाराष्ट्र केसरी किरण भगत यांनी फलटणच्या कुस्ती परंपरेचे कौतुक करत या सत्काराबद्दल समाधान व्यक्त केले. तसेच वाखरी (ता. फलटण) येथील नामवंत पैलवान जयदीप गायकवाड यांनी हिंदकेसरी लढतीदरम्यान चर्चेत आलेल्या ‘हाताची सांड काढणे’ या डावाबाबत स्पष्टीकरण देताना बचावात्मक खेळ करताना विशिष्ट हाताचा पवित्रा घ्यावा लागतो, त्यामुळे गैरसमज निर्माण झाला होता, असे सांगितले.
भाजपाचे सातारा जिल्हा सरचिटणीस जयकुमार शिंदे यांनीही फलटण तालुक्याच्या वतीने हिंदकेसरी गायकवाड यांचे अभिनंदन करत, फलटणमध्ये सत्कार स्वीकारल्याबद्दल त्यांचे आभार मानले.
फलटणच्या मातीतील कुस्ती संस्कृतीला नवचैतन्य देणारा हा सत्कार सोहळा उपस्थितांच्या टाळ्यांच्या कडकडाटात आणि जल्लोषात पार पडला. यावेळी नगरसेवक अशोकराव जाधव,रोहित नागटिळे, राहुल निंबाळकर ,अमित भोईटे, सचिन अहिवळे, अमोल सस्ते, अनुप शहा कुस्ती क्षेत्रातील नामवंत पैलवान, नगरपालिकेचे कर्मचारी पदाधिकारी उपस्थित होते.
