संपादक : पोपट मारुती मिंड
फलटण( आपलं फलटण )फलटण पंचायत समितीच्या उपसभापतीपदी निवड झालेले शिवसेना (एकनाथ शिंदे गट)चे अमोल सस्ते यांचा पदग्रहण सोहळा मोठ्या उत्साहात व जल्लोषात पार पडला. पारंपरिक पद्धतीने फेटे बांधून व पुष्पगुच्छ देऊन मान्यवरांच्या हस्ते त्यांचा सत्कार करण्यात आला.
कार्यक्रमाच्या प्रारंभी नवनियुक्त उपसभापतींचे जल्लोषात स्वागत करण्यात आले. सभागृहात शिवसैनिक, पदाधिकारी, कार्यकर्ते तसेच नागरिकांची मोठी उपस्थिती होती. वातावरणात उत्साहाचे आणि आनंदाचे चित्र दिसून आले.
पदग्रहणानंतर आपल्या मनोगतात अमोल सस्ते यांनी उपस्थितांचे आभार मानत, पंचायत समितीच्या माध्यमातून विकासकामांना गती देण्याचा निर्धार व्यक्त केला. ग्रामीण भागातील पायाभूत सुविधा मजबूत करण्यावर भर देत, सर्वसामान्य नागरिकांच्या प्रश्नांना प्राधान्य देण्याची ग्वाही त्यांनी दिली.
या सोहळ्याला माजी आमदार दीपक चव्हाण, सातारा जिल्हा परिषदेचे माजी अध्यक्ष संजीवराजे ना.निंबाळकर, नगरसेवक अनिकेतराजे ना. निंबाळकर यांच्यासह शिवसेनेचे पदाधिकारी, पंचायत समिती व जिल्हा परिषद सदस्य तसेच विविध राजकीय व सामाजिक क्षेत्रातील मान्यवरांची उपस्थिती लाभली. उपस्थितांनी नवनियुक्त उपसभापतींना शुभेच्छा देत पुढील कार्यकाळासाठी शुभेच्छांचा वर्षाव केला.
कार्यक्रम उत्साही वातावरणात संपन्न झाला.
