संपादक : पोपट मारुती मिंड
फलटण (आपलं फलटण) : सबॉर्डिनेट इंजिनिअर्स असोसिएशन (एमएसईबी) को-ऑप. क्रेडिट सोसायटी लि., पुणे या संस्थेने सहकार क्षेत्रातील उल्लेखनीय कामगिरीची परंपरा कायम राखत राज्यस्तरीय पातळीवर पुन्हा एकदा मानाचा किताब मिळवला आहे. महाराष्ट्र राज्य सहकारी पतसंस्था फेडरेशन लि., मुंबई यांच्या वतीने देण्यात येणारा प्रतिष्ठेचा “राज्यस्तरीय दीपस्तंभ पुरस्कार २०२५” प्रथम क्रमांकाने या संस्थेला जाहीर झाला आहे. विशेष म्हणजे हा पुरस्कार संस्थेला सलग सातव्यांदा मिळाल्याने सहकार क्षेत्रात संस्थेच्या कार्याची दखल राज्यभर घेतली जात आहे.
महाराष्ट्र राज्य सहकारी पतसंस्था फेडरेशनने राज्यातील पतसंस्थांच्या कामगिरीचा आढावा घेऊन “राज्यस्तरीय दीपस्तंभ पुरस्कार २०२५” स्पर्धा आयोजित केली होती. या स्पर्धेसाठी सबॉर्डिनेट इंजिनिअर्स असोसिएशन (एमएसईबी) को-ऑप. क्रेडिट सोसायटीने सादर केलेल्या प्रस्तावाची तज्ज्ञ समितीकडून छाननी करण्यात आली. आर्थिक शिस्त, आधुनिक तंत्रज्ञानाचा वापर, कर्जवसुलीची प्रभावी यंत्रणा, सहकार चळवळीत योगदान आणि सामाजिक कार्य या विविध निकषांवर संस्थेची कामगिरी उजवी ठरल्याने तिला प्रथम क्रमांकाचा सन्मान जाहीर करण्यात आला.
पुरस्कार वितरण समारंभ नुकताच पुणे जिल्ह्यातील नसरापूर येथील आर्यन रिक्रिएशन रिसॉर्ट येथे झालेल्या महाराष्ट्र राज्य सहकारी पतसंस्था फेडरेशनच्या राज्यस्तरीय प्रशिक्षण शिबिरात पार पडला. यावेळी भारतीय रिझर्व्ह बँकेचे संचालक सतीश मराठे, सहकार भारतीचे राष्ट्रीय अध्यक्ष उदय जोशी तसेच फेडरेशनचे अध्यक्ष काकासाहेब कोयटे यांच्या हस्ते हा पुरस्कार प्रदान करण्यात आला. कार्यक्रमास फेडरेशनच्या मुख्य कार्यकारी अधिकारी सुरेखा लवांडे यांची प्रमुख उपस्थिती होती.
पुरस्कार संस्थेचे अध्यक्ष अभि. शिवाजीराव कृष्णराव लाड, सचिव अभि. रविंद्र ननवरे, कार्यलक्षी संचालिका प्रद्मा प्रदीप पवार तसेच वसुली अधिकारी भाग्यश्री राजय ताठे यांनी स्विकारला.
संस्थेच्या ठेवींचे वाढते प्रमाण, कर्ज थकबाकीवर प्रभावी नियंत्रण, सामाजिक उपक्रमांमध्ये सक्रिय सहभाग आणि काटेकोर आर्थिक शिस्त या सर्व बाबींमध्ये संस्थेने उल्लेखनीय कामगिरी केली आहे. संस्थेचे अध्यक्ष शिवाजीराव लाड यांच्या नेतृत्व व मार्गदर्शनाखाली ही यशस्वी वाटचाल शक्य झाल्याचे संस्थेच्या वतीने सांगण्यात आले.
या यशाबद्दल जिल्हा उपनिबंधक सहकारी संस्था, पुणे, महाराष्ट्र राज्य सहकारी संघ मर्या., पुणे, महाराष्ट्र राज्य सहकारी पतसंस्था फेडरेशन लि., मुंबई, पुणे जिल्हा नागरी सहकारी पतसंस्था फेडरेशन मर्या., पुणे, अविज पब्लिकेशन बँको कोल्हापूर, पुणे जिल्हा मध्यवर्ती सहकारी बँक लि., पुणे, कॉसमॉस बँक लि., पुणे यांच्यासह संस्थेचे सर्व सभासद, संचालक मंडळ, कर्मचारी वर्ग तसेच अंतर्गत व वैधानिक लेखापरीक्षकांचे संस्थेने मनःपूर्वक आभार मानले आहेत.
▪ सलग सातव्यांदा मानाचा किताब
सबॉर्डिनेट इंजिनिअर्स असोसिएशन (एमएसईबी) को-ऑप. क्रेडिट सोसायटीला राज्यस्तरीय “दीपस्तंभ पुरस्कार” सलग सातव्यांदा प्राप्त झाला आहे. सातत्यपूर्ण आर्थिक शिस्त, उत्कृष्ट कर्जवसुली आणि आधुनिक व्यवस्थापन पद्धती यामुळे संस्थेने राज्यातील सहकारी पतसंस्थांमध्ये वेगळी ओळख निर्माण केली आहे.
▪ पुरस्कार स्वीकारताना पदाधिकारी उपस्थित
पुरस्कार स्वीकारताना संस्थेचे अध्यक्ष शिवाजीराव कृष्णराव लाड, सचिव रविंद्र ननवरे, कार्यलक्षी संचालिका प्रद्मा प्रदीप पवार तसेच वसुली अधिकारी भाग्यश्री राजय ताठे उपस्थित होते. कार्यक्रमात सहकार क्षेत्रातील अनेक मान्यवर उपस्थित होते.
▪ सहकार क्षेत्रात आदर्श कामगिरी
ठेवींची सातत्याने वाढ, थकबाकी नियंत्रण, सामाजिक उपक्रम आणि पारदर्शक आर्थिक व्यवहार यामुळे संस्थेने सहकार क्षेत्रात आदर्श निर्माण केला आहे. पदाधिकारी, कर्मचारी आणि सभासदांच्या एकत्रित प्रयत्नांमुळेच ही यशस्वी वाटचाल शक्य झाल्याचे संस्थेने नमूद केले आहे.
