संपादक : पोपट मारुती मिंड
आपलं फलटण प्रतिनिधी : फलटण एज्युकेशन सोसायटीच्या स्वायत्त कॉलेज ऑफ इंजिनिअरिंगच्या माजी विद्यार्थी संघटनेतर्फे आयोजित माजी विद्यार्थी मेळावा पिंपरी-चिंचवडमधील ताथवडे येथील जीएमके बँक्वेट हॉलमध्ये उत्साहपूर्ण वातावरणात संपन्न झाला. विविध बॅचमधील शेकडो माजी विद्यार्थी, प्राध्यापक आणि मान्यवरांच्या उपस्थितीत जुन्या आठवणींना उजाळा देतानाच महाविद्यालयाच्या उज्ज्वल वाटचालीचा गौरव करण्यात आला.
कार्यक्रमाचे उद्घाटन पूजा प्रिसिजन इंजिनिअरिंग लि., चाकणचे चेअरमन अनिल कुलकर्णी यांच्या हस्ते दीपप्रज्वलनाने झाले. आपल्या मार्गदर्शनपर भाषणात त्यांनी बदलत्या औद्योगिक जगतातील संधी आणि आव्हानांचा वेध घेत विद्यार्थ्यांनी केवळ नोकरीकडे न पाहता उद्योजकतेचा मार्ग स्वीकारण्याचे आवाहन केले. “जीवनात आणि व्यवसायात यशस्वी व्हायचे असेल तर सचोटी, हातोटी आणि कसोटी या त्रिसूत्रीवर खरे उतरावे लागते. या गुणांच्या बळावरच जागतिक स्तरावर स्वतःची वेगळी ओळख निर्माण करता येते,” असे प्रेरणादायी विचार त्यांनी व्यक्त केले.
कार्यक्रमाच्या अध्यक्षस्थानावरून बोलताना फलटण एज्युकेशन सोसायटीचे सचिव श्रीमंत संजीवराजे नाईक-निंबाळकर यांनी महाविद्यालयाच्या स्थापनेपासूनच्या प्रवासाला उजाळा दिला. “विद्यार्थी हेच कोणत्याही शैक्षणिक संस्थेचे खरे ब्रँड अॅम्बेसेडर असतात. २०११ मध्ये महाविद्यालय सुरू झाले, त्यावेळी विद्यार्थ्यांनी व पालकांनी दाखविलेला विश्वास हीच आमची खरी ताकद ठरली. त्याच विश्वासाच्या बळावर आज हे महाविद्यालय ‘ए’ श्रेणी प्राप्त स्वायत्त संस्था म्हणून राज्यात नावारूपाला आले आहे,” असे त्यांनी सांगितले.
यावेळी श्रीमंत अनिकेतराजे नाईक-निंबाळकर यांच्यासह सीडीसी सदस्य हेमंत रानडे, भोजराज नाईक-निंबाळकर, शिरीष दोशी, शिरीष भोसले, प्रशासन अधिकारी प्राचार्य अरविंद निकम यांची प्रमुख उपस्थिती होती.
प्राचार्य डॉ. मनोजकुमार दळवी यांनी प्रास्ताविकात महाविद्यालयाच्या प्रगतीत माजी विद्यार्थ्यांचे योगदान अधोरेखित करत त्यांच्या यशाबद्दल अभिमान व्यक्त केला. विविध बॅचमधील माजी विद्यार्थ्यांनी जुन्या आठवणींना उजाळा देत महाविद्यालयाच्या विकासासाठी आणि सध्याच्या विद्यार्थ्यांना मार्गदर्शन करण्यासाठी कायम सक्रिय राहण्याचा निर्धार व्यक्त केला.
सातारा जिल्ह्यातील पहिले ‘ए’ श्रेणी (NAAC A Grade) प्राप्त अभियांत्रिकी महाविद्यालय म्हणून फलटण एज्युकेशन सोसायटीच्या कॉलेज ऑफ इंजिनिअरिंगने वेगळी ओळख निर्माण केली आहे. तसेच NBA मान्यतेसह गुणवत्तापूर्ण शिक्षणाची परंपरा जपत संस्थेने अभियांत्रिकी क्षेत्रात उल्लेखनीय स्थान मिळविले आहे.
कार्यक्रमाच्या यशस्वी आयोजनासाठी माजी विद्यार्थी संघटनेच्या सदस्यांनी विशेष परिश्रम घेतले. प्रा. अमरसिंह रणवरे यांनी आभार मानल्यानंतर उत्साहपूर्ण वातावरणात मेळाव्याची सांगता झाली.
