संपादक : पोपट मारुती मिंड
तरुणांच्या आरोग्याशी खेळणाऱ्यांवर पोलिसांचा आणि अन्न व औषध प्रशासनाचा संयुक्त बडगा
फलटण( पुढारी वृत्तसेवा ) शासनाने प्रतिबंधित केलेल्या गुटखा, पान मसाला आणि सुगंधित तंबाखूच्या विक्री व साठवणुकीविरोधात फलटण शहर पोलिस आणि अन्न व औषध प्रशासन विभागाने संयुक्त कारवाई करत मोठा साठा जप्त केला आहे. या कारवाईत एकूण 41 हजार 180 रुपयांचा प्रतिबंधित अन्नपदार्थांचा साठा हस्तगत करण्यात आला असून एका संशयितास अटक करण्यात आली आहे.पोलिसांनी दिलेल्या माहितीनुसार, दि. १७ जून २०२६ रोजी रात्री साडेआठच्या सुमारास नरसोबानगर, कोळकी (ता. फलटण) येथे किरण शशिकांत दोशी यांच्या घरामध्ये शासनाने प्रतिबंधित केलेल्या गुटखा, पान मसाला व सुगंधित तंबाखूचा साठा असल्याची माहिती मिळाली होती. त्यानुसार अन्न व औषध प्रशासन विभाग, सातारा यांनी फलटण शहर पोलिसांच्या मदतीने छापा टाकून ही कारवाई केली.
या कारवाईदरम्यान प्रतिबंधित गुटखा, पान मसाला व सुगंधित तंबाखूचा मोठा साठा जप्त करण्यात आला. याप्रकरणी किरण शशिकांत दोशी (रा. नरसोबानगर, कोळकी, फलटण) यांच्यासह विविध गुटखा व पान मसाला उत्पादक कंपन्यांचे मालक, भागीदार आणि संचालकांविरुद्ध गुन्हा दाखल करण्यात आला आहे.
अन्न सुरक्षा अधिकारी श्रीमती रुपाली आप्पासाहेब खापणे यांनी दिलेल्या तक्रारीवरून फलटण शहर पोलिस ठाण्यात गुन्हा रजिस्टर क्रमांक २३०/२०२६ दाखल करण्यात आला आहे. अन्न सुरक्षा व मानके अधिनियम २००६ मधील विविध कलमांसह भारतीय न्याय संहितेतील संबंधित कलमांनुसार हा गुन्हा नोंदविण्यात आला आहे.
याप्रकरणी किरण दोशी यांना अटक करण्यात आली असून पुढील तपास पोलीस उपनिरीक्षक दिनेश शिंदे करीत आहेत.
समाज प्रबोधन : गुटखा म्हणजे आरोग्याचा मूक घातक
गुटखा, पान मसाला आणि सुगंधित तंबाखू हे पदार्थ केवळ कायद्यानेच नव्हे तर आरोग्याच्या दृष्टीनेही अत्यंत घातक मानले जातात. तोंडाचा कर्करोग, दात व हिरड्यांचे आजार, हृदयविकार आणि व्यसनाधीनता यांसारख्या गंभीर समस्यांना हे पदार्थ कारणीभूत ठरतात. विशेषतः युवक आणि विद्यार्थ्यांमध्ये वाढणारे व्यसन ही चिंतेची बाब आहे. त्यामुळे प्रतिबंधित तंबाखूजन्य पदार्थांची विक्री, खरेदी अथवा साठवणूक आढळल्यास नागरिकांनी तत्काळ संबंधित प्रशासनाला माहिती देऊन समाजहिताच्या या मोहिमेत सहभागी व्हावे, असे आवाहन प्रशासनाकडून करण्यात आले आहे.
