संपादक : पोपट मारुती मिंड
दहिवडी ( आपलं फलटण प्रतिनिधी)रयत शिक्षण संस्थेच्या दहिवडी येथील महात्मा गांधी विद्यालय व ज्युनिअर कॉलेजचे उपमुख्याध्यापक सोमनाथ भगवानराव मिंड हे ३१ मे २०२६ रोजी आपल्या प्रदीर्घ सेवेतून सेवानिवृत्त होत आहेत. त्यांच्या या ३०-३५ वर्षांच्या समर्पित, निष्कलंक आणि आदर्श शैक्षणिक सेवेचा यथोचित गौरव करण्यासाठी सोमवार, दि. २७ एप्रिल २०२६ रोजी सकाळी ९:०० वाजता विद्यालयाच्या प्रांगणात भव्य ‘सेवापूर्ती गौरव सोहळ्या’चे आयोजन करण्यात आले आहे.सोमनाथ मिंड सरांनी आपल्या कार्यकाळात केवळ अध्यापनच नव्हे, तर विद्यार्थ्यांमध्ये शिस्त आणि शैक्षणिक गुणवत्ता जोपासण्यासाठी अहोरात्र कष्ट घेतले. त्यांच्या मार्गदर्शनाखाली अनेक विद्यार्थी घडले असून, त्यांच्या सर्वांगीण विकासासाठी त्यांनी केलेले कार्य शिक्षण क्षेत्रात मैलाचा दगड ठरले आहे. याच कार्याला मानाचा मुजरा करण्यासाठी दहिवडी परिसरातील ग्रामस्थ आणि शिक्षणप्रेमी व शालेय सहकारी मित्रपरिवार सज्ज झाले आहेत.या दिमाखदार सोहळ्याच्या अध्यक्षस्थानी रयत शिक्षण संस्थेचे लाईफ मेंबर बबन शिवदास खाडे हे भूषविणार आहेत. कार्यक्रमाचे प्रमुख पाहुणे म्हणून रयत शिक्षण संस्थेचे सहसचिव बी. एन. पवार आणि मॅनेजिंग कौन्सिल सदस्य सुभाष लकडे यांची विशेष उपस्थिती लाभणार आहे.याप्रसंगी अन्य मान्यवरांची मांदियाळीही जमणार असून, यामध्ये छत्रपती शाहू हायस्कूल बारामतीचे प्राचार्य गणपतराव तावरे, माण पं. स.चे गटशिक्षणाधिकारी लक्ष्मणजी पिसे, रयतचे सहविभाग अधिकारी दिनेश दाभाडे, कोरेगाव येथील डी.पी. भोसले कॉलेजचे प्रा. डॉ. अनिल दडस, रयतचे लाईफ मेंबर अर्जुन मलगुंडे, बारामती तालुका वैद्यकीय अधिकारी डॉ. मनोज खोमणे, विखळे येथील कमळेश्वर विद्या मंदिरचे माजी मुख्याध्यापक पोपटराव मिंड, स्थानिक स्कूल कमिटीचे सदस्य लालासाहेब ढवाण, सुरेंद्र मोरे आणि श्रीमती रेखाताई जाधव यांसह अनेक मान्यवर उपस्थित राहून सरांच्या कार्याचा गौरव करणार आहेत.सदर कार्यक्रमाचे नियोजन प्राचार्य एन. एस. दोरगे, पर्यवेक्षक बी. डी. चौधरी यांच्या मार्गदर्शनाखाली सर्व शिक्षक-शिक्षकेतर कर्मचारी, स्थानिक स्कूल कमिटी, माजी विद्यार्थी संघ आणि ग्रामस्थांनी केले आहे. या प्रेरणादायी सोहळ्यास परिसरातील नागरिक, माजी विद्यार्थी , हितचिंतक व निमंत्रकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांच्या वतीने करण्यात आले आहे.
