संपादक : पोपट मारुती मिंड
विडणी (आपलं फलटण प्रतिनिधी) :
महामानव विश्वरत्न डॉ. बाबासाहेब आंबेडकर यांच्या १३५ व्या जयंतीनिमित्त विडणी (ता. फलटण) येथे विविध कार्यक्रमांनी जल्लोषमय वातावरणात उत्सव साजरा करण्यात आला. संघमित्र तरुण मंडळ (बौद्धनगर) यांच्या पुढाकारातून आयोजित उपक्रमांना नागरिकांचा उत्स्फूर्त प्रतिसाद लाभला.
जयंतीनिमित्त विविध कलागुणांना वाव देणाऱ्या स्पर्धांचे आयोजन करण्यात आले. महात्मा फुले व डॉ. बाबासाहेब आंबेडकर यांच्या जीवनचरित्रावर आधारित निबंध स्पर्धा, चित्रकला, रांगोळी स्पर्धा तसेच गेम शो यामध्ये विद्यार्थ्यांनी मोठ्या उत्साहात सहभाग घेतला. याचबरोबर अंगणवाडी शाळांमध्ये फळे व अल्पोपहाराचे वाटप करून सामाजिक बांधिलकीही जपण्यात आली. महात्मा फुले जयंतीचे औचित्य साधत त्यांच्या प्रतिमेचे मान्यवरांच्या हस्ते पूजन करण्यात आले.
मंगळवार (दि. १४ एप्रिल) रोजी मध्यरात्री १२ वाजता तक्षशिला बुद्धविहारात सामुदायिक बुद्धपूजा व भिमस्तुतीचा कार्यक्रम पार पडला. यावेळी उपासक-उपासिकांची मोठ्या संख्येने उपस्थिती होती. फटाक्यांच्या आतिषबाजीने परिसर दणाणून गेला. सकाळी ९ वाजता तथागत गौतम बुद्ध व डॉ. बाबासाहेब आंबेडकर यांच्या प्रतिमांचे पूजन करून खीरदानाचे वाटप करण्यात आले. या कार्यक्रमास भारतीय बौद्ध महासभेचे पदाधिकारी, ग्रामस्थ व अनुयायी उपस्थित होते.
यानंतर बौद्धनगर ते फलटण येथील डॉ. बाबासाहेब आंबेडकर चौकापर्यंत भव्य बाईक रॅली काढण्यात आली. सायंकाळी ७ वाजता तथागत गौतम बुद्ध, क्रांतिसूर्य महात्मा फुले, डॉ. बाबासाहेब आंबेडकर, राजर्षी शाहू महाराज आदी महापुरुषांच्या प्रतिमांची भव्य शोभायात्रा काढण्यात आली. पांढऱ्या वेशात सहभागी झालेल्या उपासक-उपासिका, युवक-युवती व नागरिकांनी मिरवणुकीत मोठ्या उत्साहात सहभाग नोंदविला. भिमगीतांच्या गजरात व घोषणांनी संपूर्ण परिसर भारावून गेला.
दरम्यान, जयंतीनिमित्त गावातील शासकीय व निमशासकीय कार्यालये, ग्रामपंचायत, जिल्हा परिषद शाळा, उत्तरेश्वर हायस्कूल तसेच अंगणवाडी केंद्रांमध्येही डॉ. बाबासाहेब आंबेडकर यांच्या प्रतिमेचे पूजन करून अभिवादन करण्यात आले.
हा संपूर्ण कार्यक्रम यशस्वी करण्यासाठी संघमित्र तरुण मंडळाच्या पदाधिकाऱ्यांनी व कार्यकर्त्यांनी विशेष परिश्रम घेतले.
