संपादक : पोपट मारुती मिंड
फलटण (आपलं फलटण वृत्तसेवा) : बनावट आधारकार्ड व अन्य कागदपत्रांच्या आधारे भारतात बेकायदेशीररीत्या वास्तव्य केल्याप्रकरणी बांगलादेशी महिलेला फलटण येथील न्यायालयाने दोन वर्षांच्या साध्या कारावासाची शिक्षा सुनावली आहे. या निकालामुळे बेकायदेशीर वास्तव्याच्या प्रकरणात महत्त्वाची कारवाई झाली आहे.
या प्रकरणातील आरोपी महिला अंजला शारदाद खातून ऊर्फ सलमा अक्रतारसदान ऊर्फ सलमा हाजीर शेख (वय ३३, मूळ रा. जिरानगासा, रामपूर, शरशा, जशोरे, बांगलादेश) ही बनावट आधारकार्ड व कागदपत्रांच्या आधारे भारतात बेकायदेशीररीत्या राहत असल्याचे तपासात निष्पन्न झाले.
दि. ८ मे २०२५ रोजी फलटण तालुक्यातील भिलकटी गावच्या हद्दीतील १८ फाटा परिसरात ही बाब उघडकीस आली. याप्रकरणी फलटण ग्रामीण पोलीस ठाण्यात गुन्हा रजिस्टर क्रमांक ४६७/२०२५ नुसार भारतीय न्याय संहिता तसेच परकीय नागरिक कायदा व पारपत्र अधिनियमातील संबंधित तरतुदींनुसार गुन्हा दाखल करण्यात आला होता. पोलिसांनी आरोपी महिलेला अटक करून न्यायालयीन कोठडीत ठेवले होते.
या गुन्ह्याचा तपास पोलीस उपनिरीक्षक दीपक पवार यांनी वरिष्ठांच्या मार्गदर्शनाखाली पूर्ण करून न्यायालयात दोषारोपपत्र दाखल केले. फलटण येथील प्रथमवर्ग न्यायदंडाधिकारी न्यायालयात खटल्याची सुनावणी झाली. दोन्ही बाजूंचा युक्तिवाद ऐकल्यानंतर आरोपीविरुद्ध सबळ पुरावा निष्पन्न झाल्याने न्यायालयाने तिला दोन वर्षांच्या साध्या कारावासाची शिक्षा सुनावली.
ही कारवाई पोलीस अधीक्षक निखिल पिंगळे, अपर पोलीस अधीक्षक वैशाली कडुकर, उपविभागीय पोलीस अधिकारी धन्यकुमार गोडसे आणि फलटण ग्रामीण पोलीस ठाण्याचे प्रभारी अधिकारी प्रशांत सुबनावळ यांच्या मार्गदर्शनाखाली करण्यात आली.
या प्रकरणाच्या तपासात पोलीस उपनिरीक्षक दीपक पवार यांनी महत्त्वाची भूमिका बजावली. पोलीस कर्मचारी अमोल देशमुख यांनी सहकार्य केले, तर सरकारी अभियोक्ता अॅड. बांदल मॅडम यांनी न्यायालयात सरकार पक्षाची बाजू मांडली. न्यायालयीन कामकाजात महिला पोलीस हवालदार वैशाली नेवसे यांनी मदत केली.
