संपादक : पोपट मारुती मिंड
आपल फलटण प्रतिनिधी :
फलटण नगर परिषदेतील मालमत्ता कर वसुलीमध्ये कथित आर्थिक अनियमितता आणि गैरव्यवहार झाल्याच्या वृत्तांच्या पार्श्वभूमीवर या प्रकरणाची सखोल व निष्पक्ष चौकशी करून दोषींवर कठोर कारवाई करावी, तसेच चौकशी पूर्ण होईपर्यंत नगर परिषदेच्या मुख्याधिकाऱ्यांना निलंबित करावे, अशी मागणी महाराष्ट्र नवनिर्माण सेनेचे सातारा जिल्हा उपाध्यक्ष युवराज शिंदे यांनी जिल्हाधिकारी सातारा यांच्याकडे निवेदनाद्वारे केली आहे.
निवेदनात म्हटले आहे की, फलटण नगर परिषदेतील मालमत्ता कर वसुलीबाबत विविध माध्यमांत प्रसिद्ध झालेल्या कथित आर्थिक गैरव्यवहाराच्या बातम्यांमुळे नागरिकांमध्ये गंभीर शंका निर्माण झाली असून सार्वजनिक निधीच्या सुरक्षिततेबाबत चिंता व्यक्त केली जात आहे.
या संपूर्ण प्रकरणातील संबंधित अधिकारी, कर्मचारी तसेच निर्णय प्रक्रियेत सहभागी असलेल्या सर्व व्यक्तींची सखोल चौकशी करण्यात यावी. चौकशीदरम्यान मुख्याधिकाऱ्यांसह संबंधित सर्व अधिकाऱ्यांची भूमिका, कागदपत्रे, ऑनलाइन नोंदी व अन्य पुराव्यांची तपासणी करून दोषी आढळणाऱ्यांवर प्रचलित कायद्यानुसार कठोर कारवाई करण्यात यावी, अशी मागणीही निवेदनात करण्यात आली आहे.
तसेच चौकशी पूर्णपणे पारदर्शक पद्धतीने व्हावी, पुराव्यांमध्ये कोणताही हस्तक्षेप होऊ नये यासाठी सर्व संबंधित नोंदी सुरक्षित ठेवाव्यात आणि चौकशी पूर्ण होईपर्यंत मुख्याधिकाऱ्यांना निलंबित करण्यात यावे, अशी मागणी मनसेने केली आहे.
या निवेदनाची गंभीर दखल घेऊन प्रशासनाने तातडीने कायदेशीर व प्रशासकीय कार्यवाही करावी, अशी अपेक्षाही युवराज शिंदे यांनी जिल्हाधिकाऱ्यांकडे व्यक्त केली आहे.
