संपादक : पोपट मारुती मिंड
फलटण( आपलं फलटण प्रतिनिधी ) फलटण एज्युकेशन सोसायटीच्या अमृत महोत्सवानिमित्त व ग्रामीण कृषी जागरूकता कार्यक्रमांतर्गत मठाचीवाडी येथे सहभागी ग्रामीण मूल्यांकन (Participatory Rural Appraisal – PRA) हा उपक्रम उत्साहात पार पडला. कृषीकन्यांच्या प्रकल्पांतर्गत आयोजित या कार्यक्रमाला ग्रामस्थांचा उत्स्फूर्त प्रतिसाद लाभला.
या उपक्रमाद्वारे गावाच्या सर्वांगीण विकासासाठी आवश्यक असलेली महत्त्वपूर्ण माहिती संकलित करण्यात आली. गावाची भौगोलिक रचना, शेती पद्धती, पाणी व्यवस्थापन, सामाजिक संसाधने, स्थानिक समस्या, मातीचे प्रकार, साक्षरता तसेच लिंग गुणोत्तर आदी बाबींचा सखोल अभ्यास करण्यात आला. PRA पद्धतीच्या माध्यमातून ग्रामस्थांच्या सहभागातून गावाच्या गरजा व उपलब्ध साधनसंपत्तीचे विविध नकाशे तयार करण्यात आले.
कार्यक्रमाचे नियोजन व अंमलबजावणी कृषीकन्या साक्षी नाझीरकर, विद्या नवले, जोगेश्वरी लोकरे, अस्मिता नेवसे, मोनाली कोळपे, गौरी जाधव आणि श्रावणी भागवत यांनी केली.
या उपक्रमासाठी कृषी महाविद्यालयाचे प्राचार्य डॉ. यु. डी. चव्हाण, श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम अधिकारी प्रा. एन. ए. पंडित, कार्यक्रम समन्वयक प्रा. एम. एस. धालपे, प्रा. एस. एम. साळुंखे व प्रा. जी. बी. अडसुळ यांचे मार्गदर्शन लाभले.
कार्यक्रमाच्या यशस्वी आयोजनाबद्दल ग्रामस्थांनी कृषीकन्यांचे अभिनंदन करत आभार व्यक्त केले. भविष्यातही अशा लोकसहभागातून राबविण्यात येणाऱ्या विकासात्मक उपक्रमांना सहकार्य करण्याची ग्वाही ग्रामस्थांनी दिली.
