संपादक : पोपट मारुती मिंड
फलटण(आपलं फलटण प्रतिनिधी) फलटण एज्युकेशन सोसायटीच्या अमृत महोत्सवानिमित्त व ग्रामीण कृषी जागरूकता कार्यक्रमांतर्गत मठाचीवाडी येथे आंतरराष्ट्रीय योग दिन उत्साहात साजरा करण्यात आला. महात्मा फुले कृषी विद्यापीठ, राहुरी संलग्न व फलटण एज्युकेशन सोसायटी संचलित कृषी महाविद्यालय, फलटणच्या चतुर्थ वर्षातील कृषीकन्यांनी योगाचे महत्त्व पटवून देत विद्यार्थ्यांना विविध योगप्रकारांचे प्रात्यक्षिक दाखविले.
जिल्हा परिषद प्राथमिक शाळा, मठाचीवाडी येथे आयोजित कार्यक्रमात शिक्षक, कृषीकन्या व विद्यार्थ्यांनी मोठ्या उत्साहाने सहभाग घेतला. यावेळी योग दिनाचे महत्त्व विशद करण्यात आले. तसेच सूर्यनमस्कार, ध्यान, विविध योगासने व प्रार्थना यांचे आयोजन करण्यात आले. नियमित योगाभ्यासामुळे शारीरिक व मानसिक आरोग्य सुदृढ राहण्यास मदत होते, असा संदेश यावेळी देण्यात आला.
कार्यक्रमात कृषीकन्या साक्षी नाझीरकर, श्रावणी भागवत, मोनाली कोळपे, अस्मिता नेवसे, गौरी जाधव, जोगेश्वरी लोकरे व विद्या नवले यांनी सक्रिय सहभाग घेतला. शाळेचे मुख्याध्यापक शिंदे सर, प्राध्यापिका क्षितिजा देशमुख, सुवर्णा पाठक तसेच इतर शिक्षक उपस्थित होते.
या उपक्रमासाठी कृषी महाविद्यालयाचे प्राचार्य डॉ. यु. डी. चव्हाण, श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम अधिकारी प्रा. एन. ए. पंडित, कार्यक्रम समन्वयक प्रा. एम. एस. धालपे तसेच प्रा. एस. एम. साळुंखे व प्रा. जी. बी. अडसूळ यांचे मार्गदर्शन लाभले. ग्रामीण भागात योगाबाबत जनजागृती करण्याच्या उद्देशाने हा उपक्रम राबविण्यात आला.
