संपादक : पोपट मारुती मिंड
आपलं फलटण : प्रतिनिधी
फलटण एज्युकेशन सोसायटीच्या अमृत महोत्सवानिमित्त महात्मा फुले कृषी विद्यापीठ संचलित कृषी महाविद्यालय, फलटण येथील कृषीकन्यांनी ग्रामीण जागरूकता कृषी कार्यानुभव औद्योगिक जोड प्रकल्प २०२६-२७ अंतर्गत धुळदेव येथे महिलांसाठी व युवकांसाठी कलाकंद बनविण्याचे प्रात्यक्षिक आयोजित केले.
या उपक्रमाचा मुख्य उद्देश दुग्धजन्य पदार्थांपासून घरगुती तसेच लघुउद्योगाच्या संधी उपलब्ध करून देणे हा होता. प्रात्यक्षिकादरम्यान कृषीकन्यांनी दूध, साखर, वेलची, काजू आणि बदाम यांचा वापर करून साध्या व सुलभ पद्धतीने चविष्ट व दर्जेदार कलाकंद तयार करण्याची संपूर्ण प्रक्रिया प्रत्यक्ष दाखवून दिली.
यावेळी कलाकंदाची साठवणूक, पॅकिंग, विक्री तसेच बाजारपेठ निर्माण करण्याबाबतही सविस्तर मार्गदर्शन करण्यात आले. या कार्यशाळेला गावातील महिलांनी विशेष उत्स्फूर्त प्रतिसाद देत सक्रिय सहभाग नोंदविला. घरातील उपलब्ध साहित्याचा वापर करून स्वावलंबन व रोजगारनिर्मितीच्या संधी कशा निर्माण करता येतात, याचे प्रभावी उदाहरण या प्रात्यक्षिकातून पाहायला मिळाले.
कार्यक्रमाच्या यशस्वी आयोजनाबद्दल ग्रामस्थांनी कृषीकन्यांचे मनःपूर्वक कौतुक केले.
हा उपक्रम कृषी महाविद्यालयाचे प्राचार्य डॉ. यु. डी. चव्हाण, उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम अधिकारी प्रा. सुरेश साळुंखे व प्रा. नितिशा पंडित, तसेच कार्यक्रम समन्वयक प्रा. नीलिमा धालपे यांच्या मार्गदर्शनाखाली पार पडला. यशस्वी आयोजनासाठी कृषीकन्या तेजश्री जाधव, वैभवी ननावरे, वैष्णवी वाघमारे, अस्मिता काटकर, सिद्धी धुमाळ, कावेरी पळसकर आणि सुवर्णा धिंदाळे यांनी विशेष परिश्रम घेतले.
चौकट
कलाकंद निर्मितीतून स्वावलंबनाकडे वाटचाल
दुग्धजन्य पदार्थांपासून मूल्यवर्धित उत्पादनांची निर्मिती करून ग्रामीण भागातील महिला व युवकांना रोजगाराच्या नव्या संधी उपलब्ध होऊ शकतात. धुळदेव येथे आयोजित केलेल्या या प्रात्यक्षिकातून कृषीकन्यांनी स्वयंपूर्णता, उद्योजकता आणि ग्रामीण आर्थिक विकासाचा प्रभावी संदेश दिला.
