संपादक : पोपट मारुती मिंड
फलटण (आपलं फलटण वृत्तसेवा) पुण्यश्लोक महाराणी राजमाता अहिल्यादेवी होळकर यांच्या जयंतीनिमित्त रणरागिणी बहुउद्देशीय सामाजिक विकास संस्था, फलटण यांच्या वतीने इयत्ता दहावी व बारावी परीक्षेत तृतीय क्रमांकाने उत्तीर्ण झालेल्या गुणवंत विद्यार्थी-विद्यार्थिनींचा सन्मानचिन्ह व पुष्पगुच्छ देऊन गौरव करण्यात आला.
फलटण एज्युकेशन सोसायटी हायस्कूल व ज्युनिअर कॉलेज, श्रीराम एज्युकेशन सोसायटीचे यशवंतराव चव्हाण हायस्कूल व ज्युनिअर कॉलेज, सौ. वेणूताई चव्हाण गर्ल्स हायस्कूल व ज्युनिअर कॉलेज, जय भवानी हायस्कूल व ज्युनिअर कॉलेज (तिरकवाडी) तसेच कुरेशी मोहल्ला येथील उर्दू स्कूल व ज्युनिअर कॉलेजमधील गुणवंत विद्यार्थ्यांची निवड करून त्यांचा सत्कार करण्यात आला.
यावेळी फलटण एज्युकेशन सोसायटीचे सेक्रेटरी संजीवराजे ना. निंबाळकर यांनी विद्यार्थ्यांचे अभिनंदन करून त्यांच्या उज्ज्वल भवितव्यासाठी शुभेच्छा दिल्या. शिक्षण क्षेत्रात गुणवत्ता वाढीसाठी अशा उपक्रमांची आवश्यकता असल्याचे त्यांनी नमूद केले.
दहावी व बारावीतील गुणवंत विद्यार्थ्यांचा विविध मान्यवरांच्या हस्ते सन्मान करण्यात आला. या उपक्रमातून विद्यार्थ्यांना प्रोत्साहन मिळाले असून शिक्षण क्षेत्रात अधिक मेहनत घेण्याची प्रेरणा मिळाल्याची भावना विद्यार्थ्यांनी व्यक्त केली.
कुरेशी मोहल्ला येथील उर्दू शाळेतील इयत्ता दहावीची कु. इरम अक्रम बेपारी व इयत्ता बारावीची कु. जोया मोसिन कुरेशी यांचा शाळेत जाऊन विशेष सत्कार करण्यात आला. यावेळी रणरागिणी संस्थेच्या संचालिका रझिया शेख, सचिव मारुती टकले तसेच माजी प्राचार्या शाहीन शेख उपस्थित होत्या.
या कार्यक्रमास सामाजिक, शैक्षणिक व विविध क्षेत्रांतील मान्यवरांची उपस्थिती लाभली. गुणवंत विद्यार्थ्यांच्या यशाचा गौरव करताना त्यांना पुढील शैक्षणिक वाटचालीसाठी शुभेच्छा देण्यात आल्या.
चौकट : गुणवंतांना प्रोत्साहन देण्याचा उपक्रम
पुण्यश्लोक अहिल्यादेवी होळकर यांच्या जयंतीचे औचित्य साधून रणरागिणी बहुउद्देशीय सामाजिक विकास संस्थेने गुणवंत विद्यार्थ्यांचा सन्मान करून शिक्षण क्षेत्रातील गुणवत्ता आणि स्पर्धात्मकतेला प्रोत्साहन देण्याचा स्तुत्य उपक्रम राबविला. समाजातील होतकरू विद्यार्थ्यांना प्रेरणा देणे आणि त्यांच्या यशाचा गौरव करणे हा या उपक्रमामागील प्रमुख उद्देश असल्याचे संस्थेच्या पदाधिकाऱ्यांनी सांगितले.
