संपादक : पोपट मारुती मिंड
फलटण (विशेष प्रतिनिधी):
जिद्द, चिकाटी आणि अखंड परिश्रमाच्या जोरावर एखादा खेळाडू मातीच्या मैदानावरून थेट आंतरराष्ट्रीय शिखरावर कसा पोहोचू शकतो, याचं जिवंत आणि जाज्वल्य उदाहरण म्हणजे फलटणचा सुपुत्र लखन नंदकुमार मोरे! नेपाळमधील काठमांडू येथे दि. २०, २१ आणि २२ मे २०२६ रोजी रंगणाऱ्या पहिल्या ऐतिहासिक ‘साऊथ एशियन सॉफ्ट हॉकी चॅम्पियनशिप’साठी भारतीय पुरुष सॉफ्ट हॉकी संघाच्या कर्णधारपदी लखनची निवड झाली आहे. (लखन हा फलटण येथील सामाजिक कार्यकर्ते शरद पवार यांचे निष्ठावान कार्यकर्ते नंदकुमार मोरे यांचा सुपुत्र आहे )या निवडीमुळे केवळ फलटणच्याच नव्हे, तर संपूर्ण सातारा जिल्ह्याच्या शिरपेचात मानाचा तुरा रोवला गेला असून, क्रीडा जगतातून आनंदाचा महापूर ओसंडून वाहत आहे.
‘जयपूरच्या शिबिरात लखनच्या नेतृत्वावर शिक्कामोर्तब’
राजस्थानमधील जयपूर येथे दि. १४ ते १८ मे दरम्यान भारतीय संघाचे पाच दिवसांचे विशेष राष्ट्रीय प्रशिक्षण शिबिर पार पडले. संपूर्ण देशभरातून आलेल्या शेकडो दर्जेदार खेळाडूंच्या कडक चाचणीतून उत्कृष्ट कामगिरीच्या बळावर ऑल इंडिया सॉफ्ट हॉकी फेडरेशनच्या निवड समितीने लखन मोरेच्या नेतृत्वगुणांवर विश्वास दाखवला. त्याची भारतीय संघाचा सेनापती (कर्णधार) म्हणून घोषणा होताच फलटणमध्ये ‘चक दे इंडिया’चा एकच जल्लोष सुरू झाला.
‘मैदानांची पुण्याई आणि गुरूंचे संस्कार’
लखनचा हा प्रवास सोपा नव्हता. फलटणच्या ऐतिहासिक नगरीतील मातीशी त्याची नाळ जोडलेली आहे. त्याचे माध्यमिक शिक्षण श्री. यशवंतराव चव्हाण हायस्कूल येथे, तर उच्च शिक्षण मुधोजी कॉलेज, फलटण येथे झाले.
यशवंतराव चव्हाण हायस्कूलचे मैदान, घडसोली मैदान आणि मुधोजी कॉलेजच्या मैदानांवर घाम गाळत, क्रीडा शिक्षकांच्या मार्गदर्शनाखाली लखनने हॉकीचे प्राथमिक धडे गिरवले. आज याच मैदानांची पुण्याई आणि शिक्षकांचे संस्कार लखनला आंतरराष्ट्रीय पटलावर घेऊन गेले आहेत, अशी भावना फलटणकरांमधून व्यक्त होत आहे. विशेषतः मंगळवार पेठ आणि कसबा पेठ भागात लखनच्या या यशाने चोहीकडे आनंदी आनंद पसरला आहे
‘दक्षिण आशियाई स्तरावर प्रतिष्ठेची लढाई’
काठमांडू येथील या पहिल्या-वहिल्या आंतरराष्ट्रीय स्पर्धेत भारतासह नेपाळ, पाकिस्तान आणि भूतान हे पारंपरिक प्रतिस्पर्धी देश आमनेसामने ठाकणार आहेत. दक्षिण आशियाई स्तरावरील ही अत्यंत प्रतिष्ठेची लढाई मानली जात असून, अशा मोठ्या रणसंग्रामात भारतीय संघाचे सारथ्य फलटणचा तरुण करणार, ही प्रत्येक मराठी माणसासाठी अभिमानाची गोष्ट आहे.
‘नेतेमंडळी व क्रीडाप्रेमींकडून शुभेच्छांचा वर्षाव!
लखन मोरेच्या या ऐतिहासिक कामगिरीबद्दल पंतप्रधान कार्यालयाकडून फोन द्वारे, माजी केंद्रीय कृषिमंत्री शरद पवार, विधान परिषदेचे माजी सभापती आमदार श्रीमंत रामराजे ना. निंबाळकर, माजी आमदार दीपक चव्हाण, कृषी उत्पन्न बाजार समितीचे चेअरमन रघुनाथराजे ना. निंबाळकर, शिवसेना नेते श्रीमंत संजीवराजे ना. निंबाळकर, नगरसेवक श्रीमंत अनिकेतराजे ना. निंबाळकर, फलटण पंचायत समितीचे माजी सभापती विश्वजीतराजे ना. निंबाळकर यांच्यासह विविध संस्थांचे पदाधिकारी, क्रीडा शिक्षक, प्रशिक्षक आणि सिनिअर खेळाडूंनी त्याचे प्रत्यक्ष व सोशल मीडियाद्वारे अभिनंदन केले आहे.
’आपलं फलटण’ समूहाकडून भारतीय संघाचा कर्णधार लखन मोरे आणि संपूर्ण भारतीय संघाला या आंतरराष्ट्रीय स्पर्धेत सुवर्णमय कामगिरी करण्यासाठी ‘विजयी भव’च्या मनःपूर्वक शुभेच्छा!
