संपादक : पोपट मारुती मिंड
फलटण (आपलं फलटण )फलटण नगर परिषदेच्या पहिल्या विशेष सर्वसाधारण सभेत शहर विकासाशी संबंधित 46 विषयांवर चर्चा झाली, मात्र विषय क्रमांक 9 — नामांतराचा मुद्दा — सर्वाधिक वादग्रस्त ठरला. सत्ताधारी व विरोधी गटात जोरदार शाब्दिक चकमक झाली. अखेर नगराध्यक्ष समशेरसिंह नाईक निंबाळकर यांनी महापुरुषांची नावे पुढील पिढीसाठी प्रेरणादायी असल्याचे सांगत ठराव बहुमताने मंजूर केला.
या निर्णयानुसार नवीन पालिका इमारतीचे नाव ‘महाराजा मालोजीराव नाईक निंबाळकर भवन’ चे ‘छत्रपती शिवाजी महाराज भवन’, ‘श्री रामराजे नाईक निंबाळकर सभागृह’ चे ‘क्रांतीसूर्य महात्मा फुले सभागृह’ आणि ‘श्रीमंत संजीवराजे नाईक निंबाळकर सभागृह’ चे ‘डॉ. बाबासाहेब आंबेडकर सभागृह’ असे नामांतर करण्यात आले. तसेच ‘श्रीमंत रामराजे शॉपिंग सेंटर’ चे ‘पुण्यश्लोक अहिल्यादेवी होळकर शॉपिंग सेंटर’, जुन्या इमारतीस ‘छत्रपती सईबाई महाराणी भवन’, बारामती चौकास ‘माता रमाई चौक’, रिंग रोड परिसरास ‘छत्रपती संभाजीराजे नगर’ आणि फिरंगाई देवी मंदिर परिसरास ‘फिरंगाई देवी नगर’ अशी नवी नावे देण्यात आली.
शिवसेनेच्या नगरसेविका श्वेता तारळकर यांनी आधीच मंजूर व अंमलात आलेले ठराव बदलणे कायदेशीरदृष्ट्या अयोग्य असल्याचा आक्षेप घेतला. नगरसेवक विकास काकडे व पप्पू शेख यांनी त्यांना पाठिंबा दिला. तर राष्ट्रवादीचे नगरसेवक सचिन अहिवळे यांनी ठरावाच्या बाजूने आक्रमक भूमिका घेतल्याने सभागृहात काही काळ तणाव निर्माण झाला.
याचबरोबर, सार्वजनिक बांधकाम विभाग व जिल्हा परिषद कामांना एनओसी देण्यापूर्वी सर्वसाधारण सभेची मंजुरी आवश्यक करण्याच्या प्रस्तावावर अनिकेतराजे यांनी कायदेशीर आक्षेप घेतला. मात्र नगराध्यक्षांनी पारदर्शकता व दुबार कामे टाळण्यासाठी हा निर्णय आवश्यक असल्याचे सांगत तोही ठराव बहुमताने मंजूर केला.
सभेत शहर हद्दवाढ, स्टेडियम, नमो उद्यान, रस्ते, सीसीटीव्ही, अभय योजना, वीज, स्वच्छता, स्मशान सुशोभीकरण आदी विषयांवर सकारात्मक चर्चा व ठोस निर्णय घेण्यात आले. नामांतरावरून सभा वादळी ठरली असली तरी रखडलेल्या विकासकामांना गती देण्यासाठी ही बैठक महत्त्वपूर्ण ठरली. सर्व नगरसेवक उपस्थित होते.
