संपादक : पोपट मारुती मिंड
आपलं फलटण प्रतिनिधी :
फलटण एज्युकेशन सोसायटीच्या अमृतमहोत्सवी वर्षानिमित्त श्रीमंत शिवाजीराजे उद्यानविद्या महाविद्यालय व कृषी महाविद्यालय, फलटण यांच्या संयुक्त विद्यमाने ग्रामीण जागरूकता कृषी कार्यानुभव (RAWE) व औद्योगिक जोड प्रकल्प २०२६-२७ अंतर्गत विठ्ठलवाडी येथे ‘पीक उत्पादन तंत्रज्ञान ॲप्लिकेशन’ या विषयावर शेतकऱ्यांसाठी प्रात्यक्षिक व मार्गदर्शन कार्यक्रम आयोजित करण्यात आला.
यावेळी कृषीदूत विद्यार्थ्यांनी शेतीसाठी उपयुक्त ठरणाऱ्या ॲग्रो स्टार, किसान सुविधा, भारत ॲग्री, कृषी नेटवर्क आदी मोबाईल ॲप्सची सविस्तर माहिती शेतकऱ्यांना दिली. प्रत्येक ॲपचा उपयोग, पीक व्यवस्थापनातील भूमिका, हवामान अंदाज, बाजारभाव, पीक संरक्षण, तज्ज्ञांचे मार्गदर्शन तसेच ॲप्सचा प्रत्यक्ष वापर कसा करायचा याचे प्रात्यक्षिकही सादर करण्यात आले. आधुनिक तंत्रज्ञानाचा वापर करून शेती अधिक उत्पादनक्षम व किफायतशीर करण्यासाठी ही ॲप्स उपयुक्त असल्याचे विद्यार्थ्यांनी सोप्या भाषेत स्पष्ट केले.
कार्यक्रमासाठी कृषी महाविद्यालयाचे प्राचार्य डॉ. यु. डी. चव्हाण, उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम अधिकारी प्रा. एस. एम. साळुंखे तसेच कार्यक्रम समन्वयक प्रा. नीलिमा धालपे आणि प्रा. नीतीशा पंडित यांचे मार्गदर्शन लाभले.
कार्यक्रमाच्या यशस्वी आयोजनासाठी कृषीदूत साहिल आतकिरे, सुमित शितोळे, ओंकार गारगोटे, धीरज पाटील, सोहम गरड, वैभवराज सुरवसे आणि तुषार ठेंगल यांनी उत्स्फूर्त सहभाग घेतला. त्यांच्या नियोजनबद्ध प्रयत्नांमुळे हा उपक्रम शेतकऱ्यांसाठी माहितीपूर्ण, प्रेरणादायी आणि आधुनिक शेतीकडे वाटचाल घडविणारा ठरल्याची भावना उपस्थित शेतकऱ्यांनी व्यक्त केली.
