संपादक : पोपट मारुती मिंड
फलटण (आपलं फलटण) शाहरी-
ग्रामीण रुग्णांना आपल्या आपुलकीच्या स्पर्शाने आणि अत्याधुनिक वैद्यकीय सेवेने नवजीवन देणारे फलटणचे सुप्रसिद्ध अस्थिरोग तज्ज्ञ डॉ. प्रसाद जोशी यांना पुणे येथे अत्यंत प्रतिष्ठेच्या ‘जीवनगौरव पुरस्कारा’*ने सन्मानित करण्यात आले. या पुरस्कारामुळे फलटणच्या वैद्यकीय क्षेत्रातील गुणवत्तेची आणि सेवाभावी वृत्तीची दखल आता राज्यस्तरावर घेतली गेल्याचे अधोरेखित झाले आहे.
ग्रीन सोल्युशन्स प्रा. लि.’ या संस्थेच्या १४ व्या वर्धापनदिनानिमित्त २३ मे २०२६ रोजी पुण्यातील प्रसिद्ध ‘द ऑर्किड हॉटेल’ (The Orchid Hotel) येथे एक भव्य सोहळा पार पडला. या दिमाखदार कार्यक्रमात प्रख्यात अभिनेते मकरंद अनासपुरे आणि ‘लोकमत’ (पुणे) चे मुख्य संपादक संजय आवटे यांच्या शुभहस्ते डॉ. प्रसाद जोशी यांना हा जीवनगौरव पुरस्कार प्रदान करून गौरविण्यात आले.
गेल्या अनेक वर्षांपासून डॉ. प्रसाद जोशी यांनी फलटण आणि परिसरातील रुग्णांना अचूक निदान, आधुनिक उपचार आणि सहानुभूतीपूर्ण सेवा देत लोकांचा दृढ विश्वास संपादन केला आहे. ग्रामीण भागातील सर्वसामान्य रुग्णांना मोठ्या शहरात धावपळ करावी लागू नये, यासाठी त्यांनी फलटणमध्येच अत्यंत किफायतशीर आणि दर्जेदार ऑर्थोपेडिक सेवा उपलब्ध करून दिली आहे. त्यांच्या याच निस्पृह सेवेचा आणि योगदानाचा हा गौरव आहे.
“हा सन्मान समाजासाठी अधिक जोमाने आणि निष्ठेने कार्य करण्याची प्रेरणा देणारा आहे.”
डॉ. प्रसाद जोशी यांची भावना.
पर्यावरणीय परिसंस्था व्यवस्थापन (Environmental Ecosystem Management) क्षेत्रात देशपातळीवर आपला ठसा उमटवणाऱ्या ‘Green Solutions Pvt. Ltd.’ या संस्थेने १४ वर्षे यशस्वीरीत्या पूर्ण केली आहेत. भारताचे नॉर्वेमध्ये प्रतिनिधित्व करणाऱ्या या संस्थेचे संचालक सागर अहिवळे आणि आरती भोसले-अहिवळे यांच्याही उल्लेखनीय कामगिरीचे या सोहळ्यात विशेष कौतुक करण्यात आले. डॉ. जोशी यांनी पुरस्कार स्वीकारल्यानंतर या दोघांचे आणि संस्थेचे मनापासून आभार मानले.
फलटणच्या वैद्यकीय क्षेत्राची मान उंचावणाऱ्या डॉ. प्रसाद जोशी यांच्यावर सध्या सर्वस्तरातून अभिनंदनाचा वर्षाव होत आहे.
