संपादक : पोपट मारुती मिंड
फलटण ( आपलं फलटण)
शहरातील सर्वसामान्यांना स्वतःचे हक्काचे घर मिळावे यासाठी राबविण्यात येणाऱ्या प्रधानमंत्री आवास योजना (शहरी) २.० अंतर्गत फलटण नगरपरिषदेकडे लाभार्थी नेतृत्व बांधकाम (BLC) घटकातून २१० अर्ज प्राप्त झाले असून, त्यापैकी ९९ घरकुलांना गृहनिर्माण व शहरी विकास मंत्रालय, भारत सरकार यांच्याकडून मंजुरी देण्यात आली आहे.
मंजूर लाभार्थ्यांना एकूण ३५ लाख रुपयांचे अनुदान वितरित करण्यात आले असून, घरकुल उभारणीस गती मिळत आहे. फलटण शहरासाठी या योजनेअंतर्गत एकूण १२३० घरकुलांचे उद्दिष्ट शासनाने निश्चित केले आहे.
या पार्श्वभूमीवर शहरातील जास्तीत जास्त पात्र व इच्छुक नागरिकांनी या घरकुल योजनेचा लाभ घ्यावा, असे आवाहन नगराध्यक्ष समशेरसिंह नाईक निंबाळकर यांनी केले आहे. नागरिकांनी शासनाच्या या महत्त्वपूर्ण योजनेचा लाभ घेत स्वतःचे घराचे स्वप्न साकार करावे, असेही त्यांनी नमूद केले.
दरम्यान, योजनेविषयी अधिक माहितीसाठी नागरिकांनी फलटण नगरपरिषदेमधील प्रधानमंत्री आवास योजना कक्षास भेट द्यावी, असे आवाहन मुख्याधिकारी निखील जाधव यांनी केले आहे.
