संपादक : पोपट मारुती मिंड
फलटण ( आपलं फलटण)
पंचायत समिती फलटणची मासिक सभा नुकतीच पं.स.च्या सभागृहात सभापती शिवांजली भोसले यांच्या अध्यक्षतेखाली पार पडली.
सभेच्या प्रारंभी माजी उपमुख्यमंत्री अजितदादा पवार तसेच सुप्रसिद्ध गायिका आशा भोसले यांच्या निधनाबद्दल शोक व्यक्त करण्यात आला.
यानंतर शिक्षण, आरोग्य, पाणीपुरवठा, बांधकाम, पशुसंवर्धन व एकात्मिक बालविकास सेवा योजनांसह विविध विभागांचा सविस्तर आढावा घेण्यात आला. विशेषतः रस्ते व स्वच्छता या मूलभूत सुविधांवर अधिक भर देण्याचे ठरविण्यात आले. प्रत्येक गावापर्यंत शासकीय योजनांचा लाभ पोहोचवण्यासाठी प्रशासन व लोकप्रतिनिधींमध्ये समन्वय ठेवण्यावरही भर देण्यात आला.
मुख्यमंत्री समृद्ध पंचायत राज अभियानांतर्गत तालुक्यातील ग्रामपंचायतींचे मूल्यमापन सुरू असून, उत्कृष्ट कामगिरी करणाऱ्या ग्रामपंचायतींना बक्षिसे देण्यात येणार असल्याची माहिती यावेळी देण्यात आली.
“माझे गाव आरोग्य संपन्न गाव” या अभियानाबाबत तालुका आरोग्य अधिकारी डॉ. कोंडके यांनी मार्गदर्शन करत सर्व सदस्य व ग्रामपंचायतींनी सक्रिय सहभाग नोंदविण्याचे आवाहन केले.
“मुख्यमंत्री माझी शाळा सुंदर शाळा” या उपक्रमात जिल्हा परिषद व खासगी शाळांनी उल्लेखनीय यश संपादन केले असून, उत्कृष्ट कामगिरी करणाऱ्या शाळांचे अभिनंदन करण्यात आले.
सभेचे कामकाज सभापती शिवांजली भोसले, उपसभापती अमोल सस्ते, सदस्य तसेच गटविकास अधिकारी प्रकाशकुमार बोंबले यांच्या उपस्थितीत पार पडले.
