संपादक : पोपट मारुती मिंड
फलटण : समाजप्रबोधनाची परंपरा जपत स्वच्छतेचा वसा अंगीकारणाऱ्या डॉ. नानासाहेब धर्माधिकारी यांच्या १०४ व्या जयंतीनिमित्त फलटण शहरात रविवारी भव्य स्वच्छता अभियान राबविण्यात आले. डॉ. नानासाहेब धर्माधिकारी प्रतिष्ठान, रेवदंडा यांच्या सौजन्याने आयोजित या उपक्रमात शेकडो श्रीसदस्यांनी उत्स्फूर्त सहभाग घेत शासकीय कार्यालयांचे परिसर चकाचक केले.
रविवारी सकाळी ७ ते १० या वेळेत प्रांत कार्यालय, तहसील कार्यालय तसेच उपजिल्हा रुग्णालय परिसरात सुमारे ५०० ते ६०० श्रीसदस्यांनी हातात झाडू, खोरे, टिकाव, खुरपे, घमेले, दातुळ घेऊन स्वच्छतेचा धडाका लावला. गेल्या अनेक दिवसांपासून पालापाचोळा, वाढलेली झुडपे व गवत यामुळे अस्वच्छ झालेला परिसर अवघ्या तीन तासांत स्वच्छ करण्यात आला.
या मोहिमेदरम्यान तब्बल ११ ट्रॅक्टरच्या सहाय्याने सुमारे १० टन सुका कचरा गोळा करण्यात आला. गोळा केलेला कचरा नगरपालिकेच्या वाहनांद्वारे डम्पिंग ग्राउंड येथे नेण्यात आला. विशेष म्हणजे, या कचऱ्यापासून खतनिर्मिती करून ते प्रतिष्ठानमार्फत लावण्यात आलेल्या वृक्षांना देण्यात येते—ही पर्यावरणपूरक साखळी या उपक्रमाचे वेगळेपण ठरली.
फलटण विभागातील फलटण, फरांदवाडी, विडणी, नातेपुते आदी भागांतील श्रीसमर्थ बैठकीतील श्रीसदस्यांनी एकत्र येत हा उपक्रम यशस्वी केला. जयंतीनिमित्त देशभर शासकीय कार्यालयांचे परिसर स्वच्छ करण्याची मोहिम हाती घेण्यात आली असून, त्याचाच भाग म्हणून फलटणमध्येही हे अभियान प्रभावीपणे राबविण्यात आले.
स्वच्छतेतून समाजसेवा आणि समाजसेवेतून संस्कार अशी शिकवण देणाऱ्या या उपक्रमाचे सर्व स्तरांतून कौतुक होत असून, “स्वच्छता हीच सेवा” हा संदेश पुन्हा एकदा अधोरेखित झाला आहे.
