संपादक : पोपट मारुती मिंड
माझेरी पुनर्वसन येथे शाळा प्रवेशोत्सव उत्साहात
आपलं फलटण ( वृत्तसेवा ) शाळेचा पहिला दिवस हा प्रत्येक विद्यार्थ्याच्या आयुष्यातील अविस्मरणीय क्षण असतो. या दिवसाचे महत्त्व लक्षात घेऊन जिल्हा परिषद मॉडेल स्कूल, माझेरी पुनर्वसन (ता. फलटण, जि. सातारा) येथे शैक्षणिक वर्ष २०२६-२७ चा शाळा प्रवेशोत्सव अत्यंत उत्साहपूर्ण, आनंददायी आणि विद्यार्थीकेंद्रित वातावरणात साजरा करण्यात आला. विद्यार्थ्यांच्या सर्वांगीण विकासासाठी शाळा, पालक आणि समाज यांचे संयुक्त प्रयत्न आवश्यक” असल्याचे प्रतिपादन शिक्षण संचालनालय, पुणे येथील योजना विभागाच्या उपसंचालिका डॉ. वंदना वाहूळ यांनी केले. त्यांच्या प्रमुख उपस्थितीमुळे या कार्यक्रमाला विशेष महत्त्व प्राप्त झाले.
प्रवेशोत्सवानिमित्त शाळा परिसर आकर्षक सजावटीने सजविण्यात आला होता. नव्याने शाळेत दाखल झालेल्या विद्यार्थ्यांचे स्वागत पारंपरिक आणि आधुनिक उपक्रमांचा सुरेख संगम साधत करण्यात आले. शाळेच्या प्रवेशद्वारावर विद्यार्थ्यांवर फुलांचा वर्षाव करण्यात आला. लक्ष्मीच्या पावलांचे ठसे उमटवत विद्यार्थ्यांचे स्वागत करण्यात आले. तसेच विद्यार्थी आणि पालकांसाठी आकर्षक सेल्फी पॉइंटची उभारणी करण्यात आली होती. त्यामुळे पहिल्याच दिवशी विद्यार्थ्यांच्या मनात शाळेविषयी आपुलकी आणि आनंदाची भावना निर्माण झाली.
कार्यक्रमास विस्तार अधिकारी भाऊसाहेब सरक, राज्य समन्वयक (प्रचार व प्रसार विभाग) संभाजी देशमुख, विशेष साधन व्यक्ती विनोद शिंदे, सरपंच ज्ञानेश्वर दिघे, शाळा व्यवस्थापन समितीचे अध्यक्ष विष्णू दिघे, उपसरपंच प्रवीण दिघे, समिती सदस्य बशीर शेख, वैभव पवार तसेच ग्रामपंचायत सदस्य, पालक व ग्रामस्थ मोठ्या संख्येने उपस्थित होते.
यावेळी उपस्थित मान्यवरांनी विद्यार्थ्यांचे स्वागत करून त्यांना शैक्षणिक वाटचालीसाठी शुभेच्छा दिल्या. मार्गदर्शन करताना डॉ. वंदना वाहूळ यांनी गुणवत्तापूर्ण शिक्षणाचे महत्त्व अधोरेखित केले. विद्यार्थ्यांनी केवळ पाठ्यपुस्तकांपुरते मर्यादित न राहता विविध कौशल्ये विकसित करून सर्वांगीण प्रगती साधावी, असे आवाहन त्यांनी केले. शिक्षण हे व्यक्तिमत्त्व घडविण्याचे प्रभावी साधन असून विद्यार्थ्यांनी जिज्ञासू वृत्ती जोपासून ज्ञानार्जनाची सवय लावून घ्यावी, असेही त्यांनी सांगितले.
विद्यार्थ्यांच्या सर्वांगीण विकासाला प्राधान्य देत शाळेत सहा स्वतंत्र मार्गदर्शन केंद्रांची उभारणी करण्यात आली होती. या केंद्रांमधून विद्यार्थ्यांचा शैक्षणिक, भावनिक, सामाजिक आणि शारीरिक विकास कसा घडवून आणता येईल याविषयी पालकांना सविस्तर माहिती देण्यात आली. तसेच माता-पालक मेळाव्याचे आयोजन करून विद्यार्थ्यांच्या संगोपनात पालकांची भूमिका, शाळा-पालक समन्वयाचे महत्त्व आणि विद्यार्थ्यांच्या उज्ज्वल भविष्यासाठी आवश्यक बाबींवर चर्चा करण्यात आली.
कार्यक्रमादरम्यान उपस्थित मान्यवरांनी शाळेतील विविध उपक्रम, विद्यार्थीकेंद्रित वातावरण आणि शिक्षणातील नाविन्यपूर्ण प्रयोगांचे विशेष कौतुक केले. विद्यार्थ्यांच्या गुणवत्तावाढीसाठी आणि शाळेच्या प्रगतीसाठी सातत्याने कार्यरत असलेल्या मुख्याध्यापक रवींद्रकुमार लतींगे यांच्यासह शिक्षक गणेश पोमणे, संतोष जगताप, भारती शेळके, सरस्वती भोईटे आणि प्रिया निंबाळकर यांच्या उल्लेखनीय कार्याची दखल घेत त्यांचा सत्कार करण्यात आला.
या प्रवेशोत्सव कार्यक्रमास शाळा व्यवस्थापन समितीचे सर्व सदस्य, ग्रामपंचायत सदस्य, विविध वर्गांचे पालक, ग्रामस्थ आणि संपूर्ण ‘माझेरियन परिवार’ मोठ्या संख्येने उपस्थित होता. नव्या शैक्षणिक वर्षाची उत्साहपूर्ण सुरुवात करत विद्यार्थ्यांच्या चेहऱ्यावरील आनंद, पालकांचा उत्साह आणि शिक्षकांची समर्पित भावना यामुळे हा शाळा प्रवेशोत्सव संस्मरणीय ठरला. विद्यार्थ्यांच्या मनात शिक्षणाविषयी गोडी निर्माण करणारा आणि शाळेशी भावनिक नाते दृढ करणारा हा उपक्रम उपस्थितांच्या विशेष पसंतीस उतरला.
