संपादक : पोपट मारुती मिंड
फलटण (आपलं फलटण )फलटण एज्युकेशन सोसायटीतर्फे राबविण्यात येणारी मुधोजीराजे प्रज्ञाशोध परीक्षा (माध्यमिक विभाग) हा उपक्रम यशस्वी ठरत असून गुणवंत विद्यार्थ्यांना प्रोत्साहन देणारा उपक्रम म्हणून तो लौकिक मिळवत आहे. विद्यार्थ्यांमधील सुप्त बुद्धिमत्ता विकसित करून स्पर्धा परीक्षांसाठी सक्षम बनविण्याच्या उद्देशाने ही परीक्षा सुरू करण्यात आली आहे.
मुधोजी हायस्कूल व ज्युनिअर कॉलेज, फलटण येथे नुकत्याच झालेल्या बक्षीस वितरण समारंभात इयत्ता ५वी ते ९वीमधील सुमारे ५ हजार विद्यार्थ्यांमधून निवडलेल्या ७६ गुणवंत विद्यार्थ्यांना रोख रक्कम, प्रशस्तीपत्र व चषक देऊन गौरविण्यात आले. कार्यक्रमाच्या अध्यक्षस्थानी हेमंत रानडे होते, तर नूतन शिंदे, वसुंधरा नाईक निंबाळकर, डॉ. पुरुषोत्तम राजवैद्य, दिलीप राजगुडा, मुख्याध्यापक वसंत शेडगे आदी मान्यवर उपस्थित होते.
प्रशासन अधिकारी अरविंद निकम यांनी सांगितले की, या उपक्रमाचे हे दुसरे वर्ष असून वाढता प्रतिसाद व विद्यार्थ्यांचे यश उत्साहवर्धक आहे. ‘ना नफा’ तत्त्वावर सुरू केलेला हा उपक्रम आज यशस्वी ठरल्याचे समाधान असल्याचे त्यांनी नमूद केले.
कार्यक्रमात महाराष्ट्राचे पहिले मुख्यमंत्री यशवंतराव चव्हाण यांच्या जयंतीनिमित्त अभिवादन करण्यात आले. प्रास्ताविक मनोज कदम यांनी केले, तर सूत्रसंचालन तृप्ती शिंदे व सुजित जमदाडे यांनी केले.
फलटण एज्युकेशन सोसायटीचे अध्यक्ष रामराजे नाईक निंबाळकर, चेअरमन रघुनाथराजे नाईक निंबाळकर व सेक्रेटरी संजीवराजे नाईक निंबाळकर यांच्या मार्गदर्शनामुळे हा उपक्रम यशस्वी ठरल्याचे सांगण्यात आले. पुढील काळात ही परीक्षा जिल्हास्तरावर घेण्याचा मानस व्यक्त करण्यात आला.
