संपादक : पोपट मारुती मिंड
सातारा (आपलं फलटण) सातारा जिल्हा परिषदेच्या समाज कल्याण, महिला व बालकल्याण तसेच इतर दोन विषय समित्यांच्या सभापती पदासाठी ४ एप्रिल २०२६ रोजी होणाऱ्या दुसऱ्या विशेष सभेच्या पार्श्वभूमीवर प्रशासनाने कडक पावले उचलली आहेत. मागील अध्यक्ष-उपाध्यक्ष निवडीच्या वेळी घडलेल्या गोंधळाच्या घटनांचा धडा घेत यावेळी कोणताही अनुचित प्रकार घडू नये, यासाठी कडेकोट बंदोबस्त तैनात करण्यात आला आहे.
जिल्हाधिकारी संतोष पाटील यांनी भारतीय नागरिक सुरक्षा संहिता २०२३ च्या कलम १६३ अंतर्गत आदेश जारी करत जिल्हा परिषद इमारतीच्या १०० मीटर परिसरात प्रतिबंधात्मक आदेश लागू केले आहेत. हे निर्बंध शनिवारी सकाळी ७ वाजल्यापासून सभा संपेपर्यंत लागू राहणार आहेत.
2 विशेष म्हणजे, यापूर्वी अध्यक्ष-उपाध्यक्ष निवडीच्या वेळी जिल्हा परिषद परिसरात कार्यकर्त्यांची मोठी गर्दी झाली होती. घोषणाबाजी, ढकलाढकली तसेच तणावपूर्ण वातावरण निर्माण झाल्याने कायदा व सुव्यवस्थेचा प्रश्न उपस्थित झाला होता. सदर घटनाक्रमाचे विधानसभा व विधान परिषदेत जोरदार पडसाद उमटले होते.आरोप प्रत्यारोपांच्या फैरी झडल्या होत्या. घटनेला जबाबदार असलेल्या पोलीस अधिकाऱ्यावर निलंबनाच्या कारवाईवरून सत्ताधारीत आमने सामने आले होते. निलंबनासाठी शिवसेना राष्ट्रवादीने आक्रमक भूमिका घेतली होती तर भारतीय जनता पक्षाने तडकाफडकीच्या निलंबनाला विरोध दर्शवित निलंबनाच्या कारवाईला स्थगिती दिली होती. या पार्श्वभूमीवर प्रशासनाने यावेळी कोणतीही ढिलाई न करता आधीच कठोर उपाययोजना केल्या आहेत.
नवीन आदेशानुसार, केवळ नवनिर्वाचित सदस्य, शासकीय अधिकारी-कर्मचारी आणि बंदोबस्तावरील पोलीस अधिकारी यांनाच परिसरात प्रवेश दिला जाणार असून इतर सर्वांना प्रवेशबंदी करण्यात आली आहे. नियमांचे उल्लंघन करणाऱ्यांवर कठोर कारवाईचा इशारा देण्यात आला आहे.
दरम्यान, निवडणूक प्रक्रिया शांततेत आणि पारदर्शकतेने पार पडावी, यासाठी पोलीस यंत्रणा पूर्ण क्षमतेने तैनात करण्यात आली असून प्रशासनाच्या या निर्णयामुळे संभाव्य तणाव टाळण्यास मदत होणार असल्याचे सांगितले जात आहे.
