संपादक : पोपट मारुती मिंड
फलटण( आपलं फलटण प्रतिनिधी ) सातारा जिल्ह्यातील फलटण तालुक्यातील सासकल येथील प्रगतिशील फलोत्पादक शेतकरी बबन रामचंद्र मुळीक यांची महाराष्ट्र शासनाच्या कृषी विभागाच्या प्रतिष्ठेच्या ‘उद्यान पंडित’ पुरस्कारासाठी निवड झाली आहे. कोल्हापूर विभागातून जाहीर झालेल्या या मानाच्या पुरस्कारामुळे फलटण तालुक्याच्या शिरपेचात आणखी एक मानाचा तुरा रोवला गेला आहे.
अत्यंत प्रतिकूल परिस्थितीत आणि माळरानावरील जमिनीत जिद्द, मेहनत व आधुनिक तंत्रज्ञानाच्या बळावर बबन मुळीक यांनी आदर्श फळबाग उभी केली आहे. त्यांच्या शेतात डाळिंब, सीताफळ, अ‍ॅव्होकॅडो, वॉटर अ‍ॅपलसह तब्बल २३ प्रकारच्या फळपिकांची लागवड करण्यात आली असून विविध प्रयोगशील उपक्रमांमुळे त्यांनी शेती क्षेत्रात वेगळी ओळख निर्माण केली आहे.
महात्मा गांधी राष्ट्रीय ग्रामीण रोजगार हमी योजनेअंतर्गत फळबाग लागवडीचा लाभ घेत त्यांनी अ‍ॅव्होकॅडोची लागवड केली. महाराष्ट्रात या पिकाच्या लागवडीचे प्रारंभीचे प्रयोग यशस्वीपणे राबविणाऱ्या शेतकऱ्यांमध्ये त्यांचा उल्लेख केला जातो. तसेच कृत्रिम बुद्धिमत्ता (AI) आधारित फळपीक व्यवस्थापन तंत्रज्ञानाचा वापर करून त्यांनी उत्पादनक्षमता वाढविण्यावर भर दिला आहे.
सेंद्रिय शेतीला प्राधान्य देत त्यांनी स्वतःचे गांडूळ खत युनिट उभारले आहे. गांडूळ खत, जीवामृत, व्हर्मिव्हॉश आणि दशपर्णी अर्काचा वापर करून ते फळपिकांचे पोषण व संरक्षण करतात. प्रधानमंत्री कृषी सिंचन योजनेअंतर्गत संपूर्ण फळबागेत १०० टक्के ठिबक सिंचन प्रणालीचा अवलंब करून प्रभावी पाणी व्यवस्थापन केले आहे.
विशेष म्हणजे, उत्पादित फळांची थेट ‘शेतकरी ते ग्राहक’ या संकल्पनेतून विक्री करून त्यांनी बाजारपेठेतही स्वतंत्र ओळख निर्माण केली आहे. त्यांच्या यशामागे पत्नी संगीता मुळीक तसेच पुत्र अजिंक्य आणि निखिल मुळीक यांचे मोलाचे योगदान असल्याचे त्यांनी नमूद केले.
कृषी विभागाच्या विविध योजनांचा प्रभावी लाभ घेण्यासाठी सासकलचे सहाय्यक कृषी अधिकारी तथा ‘कृषी सेवा रत्न’ सचिन जाधव यांचे मार्गदर्शन व सहकार्य लाभल्याचेही मुळीक यांनी सांगितले.
या मानाच्या पुरस्कारासाठी निवड झाल्याबद्दल जिल्हाधिकारी सातारा संतोष पाटील, जिल्हा परिषदेचे मुख्य कार्यकारी अधिकारी याशनी नागराजन, जिल्हा अधीक्षक कृषी अधिकारी भाग्यश्री फरांदे, उपविभागीय कृषी अधिकारी खलिद मोमीन, तालुका कृषी अधिकारी दत्तात्रय गायकवाड, मंडळ कृषी अधिकारी अशोक जगदाळे, उपकृषी अधिकारी अजित सोनवलकर तसेच सहाय्यक कृषी अधिकारी सचिन जाधव यांनी बबन मुळीक यांचे अभिनंदन केले.
