संपादक : पोपट मारुती मिंड
फलटण(निंबळक प्रतिनिधी ) फलटण तालुक्याच्या पूर्व भागातील निंबळक ग्रामपंचायत हद्दीतील महत्त्वाच्या रस्ते विकासकामांसाठी तब्बल अडीच कोटी रुपयांचा निधी मंजूर झाला असून, यामागे ग्रामविकासासाठी सातत्याने पाठपुरावा करणारे राम निंबाळकर यांच्या प्रयत्नांना यश मिळाल्याची भावना ग्रामस्थांनी व्यक्त केली आहे.
माजी खासदार रणजितसिंह नाईक निंबाळकर आणि आमदार सचिन पाटील यांच्या माध्यमातून हा निधी उपलब्ध झाला असून, गावातील अनेक वर्षांपासून प्रलंबित असलेल्या रस्त्यांच्या प्रश्नाला यामुळे मोठा दिलासा मिळणार आहे.
मंजूर कामांमध्ये निंबळक इरिगेशन बंगला ते वाजेगाव रस्ता डांबरीकरणासाठी एक कोटी रुपये, तसेच निंबळक कॅनॉल ते बाबा ढाबा परिसरातील रस्ता काँक्रिटीकरणासाठी ७५ लाख रुपये आणि कॅनॉल ते बोडकेवस्ती रस्ता काँक्रिटीकरणासाठी ७५ लाख रुपये निधीचा समावेश आहे. या कामांमुळे परिसरातील नागरिक, शेतकरी व विद्यार्थ्यांच्या दळणवळणाच्या सुविधांमध्ये मोठी सुधारणा होणार आहे.
गावाच्या विकासासाठी राम निंबाळकर यांनी विविध योजनांचा सातत्याने पाठपुरावा करून अनेक विकासकामे मार्गी लावली आहेत. त्यामुळे निंबळकच्या सर्वांगीण विकासाला गती मिळाली असून, गावातील पायाभूत सुविधांमध्ये लक्षणीय बदल होत असल्याचे ग्रामस्थांचे मत आहे.
दरम्यान, संबंधित रस्त्यांची पाहणी करताना बांधकाम विभागाच्या अधिकाऱ्यांनी मंजूर कामांना लवकरच सुरुवात केली जाईल, अशी माहिती दिली. या निधीमुळे निंबळकच्या विकासाला नवी चालना मिळणार असून, ग्रामस्थांमध्ये समाधानाचे वातावरण निर्माण झाले आहे.
