संपादक : पोपट मारुती मिंड
फलटण (पुढारी वृत्तसेवा ) स्थानिक गुन्हे शाखा, सातारा आणि फलटण शहर पोलिसांनी संयुक्त कारवाई करत धुळदेव (ता. फलटण) परिसरात गांजा विक्रीसाठी आलेल्या दोघांना रंगेहात पकडले. त्यांच्या ताब्यातून ४ किलो ६९ ग्रॅम गांजा, एक मोटारसायकल आणि दोन मोबाईल फोन असा एकूण २ लाख १ हजार ७२५ रुपयांचा मुद्देमाल जप्त करण्यात आला.
अटक करण्यात आलेल्या आरोपींमध्ये अजित राजेंद्र कस्तुरे (वय ३१, रा. माळखांबी, ता. माळशिरस, जि. सोलापूर) आणि आदित्य रामचंद्र आतार (वय २५, रा. श्रीपूर, ता. माळशिरस, जि. सोलापूर) यांचा समावेश आहे.
पोलीस अधीक्षक निखिल पिंगळे आणि अपर पोलीस अधीक्षक डॉ. वैशाली कडूकर यांनी जिल्ह्यातील अवैध अंमली पदार्थांच्या विक्रीवर कठोर कारवाई करण्याच्या सूचना दिल्या होत्या. त्यानुसार स्थानिक गुन्हे शाखेचे पोलीस निरीक्षक विश्वजीत घोडके यांनी पोलीस उपनिरीक्षक परितोष दातीर यांच्या नेतृत्वाखाली विशेष पथक तयार करून कारवाईची आखणी केली होती.
२९ मे रोजी फलटण परिसरात कोंबिंग ऑपरेशन व नाकाबंदी सुरू असताना पो.उ.नि. परितोष दातीर यांना खास बातमीदारामार्फत माहिती मिळाली की, बजाज प्लॅटिना (क्र. एमएच १२ एचएक्स २६४९) या दुचाकीवरून दोन इसम धुळदेव गाव हद्दीतील रावरामोशी पुलाजवळ गांजा विक्रीसाठी येणार आहेत. माहितीची खातरजमा झाल्यानंतर स्थानिक गुन्हे शाखा आणि फलटण शहर पोलीस ठाण्याच्या संयुक्त पथकाने तातडीने सापळा रचला.
पोलिसांनी संशयितांना अडवून झडती घेतली असता त्यांच्या ताब्यातील पिशवीत ४ किलो ६९ ग्रॅम वजनाचा गांजा सदृश अंमली पदार्थ आढळून आला. त्यानंतर गांजासह दुचाकी आणि दोन मोबाईल फोन जप्त करण्यात आले. या कारवाईमुळे फलटण तालुक्यात गांजा विक्रीचे जाळे उभारण्याचा प्रयत्न पोलिसांनी वेळेत हाणून पाडला.
या धडक कारवाईत स्थानिक गुन्हे शाखेचे पोलीस निरीक्षक विश्वजीत घोडके, फलटण शहर पोलीस ठाण्याचे पोलीस निरीक्षक अरविंद काळे, सहाय्यक पोलीस निरीक्षक मिठू जगदाळे, नितीन शिंदे तसेच स्थानिक गुन्हे शाखा सातारा कडील पो.उ.नि. विश्वास शिंगाडे, परितोष दातीर, पोलीस अंमलदार मंगेश महाडिक, अमोल माने, अजय जाधव, जयवंत खांडके, अमित झेंडे, नवनाथ कदम, अजित कर्णे, अमित सपकाळ, ओंकार यादव, स्वप्निल दौंड, धिरज महाडिक, प्रविण पवार, संकेत निकम, विजय निकम, आनंदा भोये तसेच फलटण शहर पोलीस ठाण्याकडील पोलीस अंमलदार रुक्मिणी माने, बापूराव धायगुडे, निखिल गायकवाड, गणेश आवघडे, अतुल बडे यांनी कारवाईत सहभाग घेतला कारवाईतील सर्व अधिकारी व कर्मचाऱ्यांचे पोलीस अधीक्षक निखिल पिंगळे आणि अपर पोलीस अधीक्षक डॉ. वैशाली कडूकर यांनी अभिनंदन केले.
चौकट
गोपनीय माहिती ठरली निर्णायक
गांजा विक्रीसाठी येणाऱ्या संशयितांबाबत मिळालेल्या गोपनीय माहितीच्या आधारे पोलिसांनी अत्यंत नियोजनबद्ध पद्धतीने सापळा रचला. स्थानिक गुन्हे शाखा आणि फलटण शहर पोलिसांच्या समन्वयातून करण्यात आलेल्या या कारवाईत तब्बल चार किलोहून अधिक गांजा जप्त करण्यात यश आले. अंमली पदार्थविरोधातील सातारा पोलिसांची ही कारवाई जिल्ह्यातील अवैध धंद्यांवर मोठा आघात मानली जात आहे. यांच्यासह स्थानिक गुन्हे शाखा व फलटण शहर पोलीस ठाण्यातील अधिकारी आणि कर्मचाऱ्यांनी सहभाग घेतला. कारवाईतील सर्व अधिकारी व कर्मचाऱ्यांचे पोलीस अधीक्षक निखिल पिंगळे आणि अपर पोलीस अधीक्षक डॉ. वैशाली कडूकर यांनी अभिनंदन केले.
