रन फॉर एज्युकेशन’चा संदेश देत ३ जूनला फलटणमध्ये मिनी मॅरेथॉन

फलटण (आपलं फलटण )‘फलटण एज्युकेशन सोसायटी’ संचलित स्वायत्त आणि ‘NAAC A’ दर्जा तसेच ‘NBA’ मान्यता प्राप्त ‘कॉलेज ऑफ इंजिनिअरिंग, फलटण’च्या वतीने ३ जून रोजी भव्य ‘मिनी मॅरेथॉन’ स्पर्धेचे आयोजन करण्यात आले आहे. ‘रन फॉर एज्युकेशन’ या सामाजिक संदेशावर आधारित ही स्पर्धा सकाळी ७ वाजता सुरू होणार असून, फलटणकरांमध्ये उत्साहाचे वातावरण आहे.
आरोग्य आणि शिक्षणाचा संदेश देणाऱ्या या उपक्रमासाठी केवळ ५० रुपये नावनोंदणी शुल्क ठेवण्यात आले असून, विद्यार्थी, युवक, महिला तसेच ज्येष्ठ नागरिकांनी मोठ्या संख्येने सहभागी व्हावे, असे आवाहन करण्यात आले आहे.
स्पर्धा तीन वयोगटांत होणार असून विजेत्यांसाठी आकर्षक रोख बक्षिसे जाहीर करण्यात आली आहेत. १० ते १७ वर्षे गटासाठी प्रथम ५ हजार व द्वितीय ३ हजार, १८ ते ३९ वर्षे गटासाठी प्रथम १० हजार व द्वितीय ५ हजार, तर ४० वर्षांवरील गटासाठी प्रथम ५ हजार व द्वितीय ३ हजार रुपयांची बक्षिसे देण्यात येणार आहेत.
प्राचार्य डॉ. मनोजकुमार दळवी यांनी दिलेल्या माहितीनुसार, इच्छुक स्पर्धकांना अधिकृत पोस्टरवरील QR कोड स्कॅन करून ऑनलाइन नोंदणी करता येणार आहे.
या उपक्रमात फलटण शहर व ग्रामीण भागातील नागरिक, विविध शाळा-महाविद्यालयांचे विद्यार्थी, क्रीडाप्रेमी आणि ज्येष्ठांनी उत्स्फूर्त सहभाग नोंदवावा, असे आवाहन फलटण एज्युकेशन सोसायटीचे सेक्रेटरी श्रीमंत संजीवराजे नाईक निंबाळकर आणि व्यवस्थापन समितीच्या वतीने करण्यात आले आहे.