संपादक : पोपट मारुती मिंड
फलटण(आपलं फलटण प्रतिनिधी )आगामी निवडणुकांची चाहूल लागताच राजकीय वातावरण तापू लागले असून, खटकेवस्ती येथेही हालचालींना वेग आला आहे. ग्रामपंचायतीचे लोकप्रिय व विकासाभिमुख सरपंच श्री. बापुराव दत्तात्रय गावडे यांच्या वतीने भव्य ‘विजय संकल्प मेळाव्याचे’ आयोजन करण्यात आले आहे. हा मेळावा शुक्रवार, दिनांक २७ मार्च २०२६ रोजी सायंकाळी ५ वाजता संपन्न होणार आहे. या मेळाव्यास विधान परिषदेचे माजी सभापती आमदार रामराजे ना. निंबाळकर जिल्हा परिषदेचे माजी अध्यक्ष संजीवराजे ना. निंबाळकर, माजी आमदार दिपकराव चव्हाण उपस्थित राहणार आहेत. या मेळाव्यात फलटण तालुक्यातील शिवसेनेचे जिल्हा परिषद सदस्य व पंचायत समिती सदस्य यांचा सत्कार करण्यात येणार आहे.
या मेळाव्याच्या माध्यमातून खटकेवस्ती परिसराच्या सर्वांगीण विकासाचा आढावा घेण्यासोबतच आगामी काळातील विकास आराखड्याचा संकल्प मांडला जाणार आहे. सरपंच गावडे यांच्या नेतृत्वाखाली झालेल्या विविध विकासकामांची माहिती नागरिकांसमोर ठेवत पुढील वाटचालीचा रोडमॅप स्पष्ट केला जाणार असल्याचे समजते.
दरम्यान, या मेळाव्याला विविध राजकीय क्षेत्रातील दिग्गज नेते, स्थानिक पदाधिकारी, तरुण वर्ग तसेच नागरिक मोठ्या संख्येने उपस्थित राहणार असल्याची चर्चा आहे. त्यामुळे हा मेळावा केवळ विकास आढावा कार्यक्रम न राहता, आगामी निवडणुकांच्या पार्श्वभूमीवर शक्तीप्रदर्शनाचा मंच ठरण्याची शक्यता व्यक्त केली जात आहे.
“गावाच्या विकासाचा रथ अधिक वेगाने पुढे नेण्यासाठी आणि नागरिकांच्या विश्वासाला अधिक बळकटी देण्यासाठी हा विजय संकल्प मेळावा महत्त्वपूर्ण ठरेल,” असा विश्वास आयोजकांकडून व्यक्त करण्यात आला आहे.
खटकेवस्तीतील हा मेळावा आगामी राजकीय समीकरणांवर परिणाम करणारा ठरू शकतो, अशी चर्चा सध्या परिसरात रंगू लागली आहे.
