संपादक : पोपट मारुती मिंड
फलटण नगरपरिषदेत आज ४६ विषयांवर चर्चा; नामांतराचा मुद्दा ठरणार केंद्रस्थानी
फलटण ( फलटण आपलं फलटण )फलटण नगरपरिषदेची आज (दि. २५ मार्च) होणारी सर्वसाधारण सभा शहराच्या विकासाच्या दृष्टीने महत्त्वपूर्ण मानली जात असून, तब्बल ४६ विषयांवर चर्चा होणार आहे. मात्र, या सर्व विषयांमध्ये विषय क्रमांक ९ अंतर्गत मांडण्यात आलेला नामांतराचा प्रस्ताव सर्वाधिक गाजण्याची शक्यता व्यक्त होत आहे. यामुळे सभागृहात सत्ताधारी आणि विरोधक आमनेसामने येण्याचे संकेत मिळत आहेत.
नगरपरिषदेच्या मालकीच्या इमारती, सभागृहे, शॉपिंग सेंटर आणि काही भागांना दिलेली नावे बदलून त्या ठिकाणी थोर महापुरुषांची नावे देण्याचा प्रस्ताव सत्ताधाऱ्यांनी विषय पत्रिकेतून पुढे आणला आहे. शहराच्या वैभवात भर घालण्यासाठी आणि महापुरुषांचा सन्मान करण्याच्या उद्देशाने हा प्रस्ताव मांडण्यात आल्याचे सांगितले जात असले, तरी विरोधकांनी यास ठाम विरोध दर्शविला आहे.
विरोधकांच्या मते, शहराची ऐतिहासिक आणि सांस्कृतिक परंपरा जपणे तितकेच महत्त्वाचे आहे. अनेक वर्षांपासून प्रचलित असलेली नावे बदलणे योग्य नसून, नवीन विकसित होणाऱ्या भागांना महापुरुषांची नावे देण्याचा पर्याय स्वीकारावा, अशी भूमिका त्यांनी मांडली आहे. विशेषतः काही वास्तूंशी संबंधित ऐतिहासिक संदर्भ लक्षात घेता नामांतर टाळावे, अशी मागणी पत्राद्वारे नगराध्यक्षांकडे करण्यात आली आहे.
दरम्यान, शहराच्या विकासाशी संबंधित इतर महत्त्वाचे विषयही सभेत चर्चेला येणार असले, तरी त्यावर मोठा वाद न होता ते मंजूर होण्याची शक्यता वर्तवली जात आहे. मात्र, नामांतराच्या मुद्द्यावरून वातावरण तापण्याची चिन्हे स्पष्ट दिसत आहेत. सत्ताधाऱ्यांचा महापुरुषांच्या नावांचा आग्रह आणि विरोधकांचा ऐतिहासिक नावे जपण्याचा मुद्दा यामुळे सभागृहात जोरदार चर्चा रंगण्याची शक्यता आहे.
सभेपूर्वीच शहरभर या विषयावर उलटसुलट चर्चा सुरू असून, विविध स्तरांतून मतप्रवाह व्यक्त होत आहेत. त्यामुळे आजच्या सभेत प्रशासन कोणती भूमिका घेते आणि नामांतराचा प्रस्ताव मंजूर होतो की स्थगित ठेवला जातो, याकडे संपूर्ण फलटणकरांचे लक्ष लागले आहे.
