संपादक : पोपट मारुती मिंड
आपलं फलटण ( वृत्तसेवा )
सातारा-सांगली स्थानिक प्राधिकरण मतदारसंघाच्या विधान परिषद निवडणुकीसाठी फलटण येथील मतदान केंद्रावर मतदानाची प्रक्रिया गुरुवारी शांततेत आणि उत्साहपूर्ण वातावरणात पार पडली. केंद्रावर नोंद असलेल्या सर्व ३१ मतदारांनी आपला मतदानाचा हक्क बजावल्याने येथे शंभर टक्के मतदानाची नोंद झाली.
फलटण तहसील कार्यालयातील मतदान केंद्रावर सकाळी ८ वाजता मतदानास प्रारंभ झाला. निवडणूक प्रक्रियेदरम्यान प्रशासनाने आवश्यक सर्व सुविधा उपलब्ध करून दिल्या होत्या.
दुपारी साडेबारा वाजण्याच्या सुमारास शिवसेनेचे १० नगरसेवक मतदार अनिकेतराजे नाईक निंबाळकर यांच्या समवेत मतदान केंद्रावर दाखल झाले. त्यांनी नियमानुसार मतदानाचा हक्क बजावला.
त्यानंतर दुपारी तीनच्या सुमारास भारतीय जनता पक्ष व राष्ट्रवादी काँग्रेस पक्षाचे २१ मतदार नगराध्यक्ष समशेरसिंह नाईक निंबाळकर यांच्या समवेत मतदान केंद्रावर आले. त्यांनीही मतदान प्रक्रियेत सहभागी होत आपले मतदान नोंदविले.
फलटण मतदान केंद्रावर एकूण ३१ मतदारांची नोंद होती. विशेष म्हणजे सर्वच मतदारांनी मतदान केल्याने केंद्रावर शंभर टक्के मतदानाची नोंद झाली. संपूर्ण मतदान प्रक्रिया अत्यंत शांततेत, कोणताही अनुचित प्रकार न घडता पार पडली.
मतदान केंद्रावर कायदा व सुव्यवस्था अबाधित राखण्यासाठी फलटण शहर पोलीस ठाण्याचे पोलीस निरीक्षक अरविंद काळे यांच्या मार्गदर्शनाखाली चोख पोलीस बंदोबस्त तैनात करण्यात आला होता.
फलटण केंद्रावरील मतदान प्रक्रिया प्रांताधिकारी प्रियंका आंबेकर यांच्या मार्गदर्शनाखाली यशस्वीरीत्या पूर्ण झाल्यानंतर तहसीलदार डॉ. अभिजित जाधव यांनी केंद्रावर १०० टक्के मतदान झाल्याची अधिकृत माहिती दिली.
