संपादक : पोपट मारुती मिंड
फलटण( आपलं फलटण खटके वस्ती प्रतिनिधी)
अक्षय बापूराव गावडे यांच्या वाढदिवसानिमित्त खटकेवस्ती तालुका फलटण येथे विविध विकासकामांचे भूमिपूजन व उद्घाटन सोहळ्याचे आयोजन करण्यात आले असून, यानिमित्ताने नागरिकांसाठी अनेक लोकहिताचे आणि शासकीय योजनांशी संबंधित उपक्रम राबविण्यात येणार आहेत. रविवार, दि. १० जून रोजी सकाळी ९ वाजता ग्रामपंचायत मैदान, खटकेवस्ती येथे हा कार्यक्रम पार पडणार आहे.
वाढदिवसानिमित्त आयोजित करण्यात आलेल्या या विशेष कार्यक्रमात नागरिकांना विविध योजनांचा प्रत्यक्ष लाभ देण्यावर भर देण्यात आला आहे. खराब किंवा हरवलेल्या रेशनकार्डधारकांना नवीन रेशनकार्ड काढून देणे, रेशनकार्ड ऑनलाइन नोंदणी, महिलांसाठी एस.टी. बस प्रवास सवलत पास काढून देणे, बांधकाम कामगार योजनेतील फिल्टर वाटप, नव्या बांधकाम कामगारांसाठी पेटी वाटप तसेच संजय गांधी निराधार योजनेची नवीन प्रकरणे दाखल करून घेण्याची सुविधा उपलब्ध करून देण्यात येणार आहे.
याशिवाय पर्यावरण संवर्धनाचा संदेश देण्यासाठी वृक्षारोपण कार्यक्रमाचे आयोजन करण्यात आले असून, नागरिकांच्या आरोग्याच्या दृष्टीने भव्य रक्तदान शिबिरही भरविण्यात येणार आहे. कार्यक्रमानंतर उपस्थितांसाठी सस्नेह भोजनाची व्यवस्था करण्यात आली आहे.
या कार्यक्रमासाठी परिसरातील नागरिकांनी मोठ्या संख्येने उपस्थित राहून विविध योजनांचा लाभ घ्यावा, असे आवाहन आयोजकांच्या वतीने करण्यात आले आहे. वाढदिवसाचे औचित्य साधून सामाजिक बांधिलकी जपत विकासकामांना गती देण्याचा आणि सर्वसामान्यांना शासनाच्या योजनांचा लाभ मिळवून देण्याचा प्रयत्न या उपक्रमातून करण्यात येत असल्याने परिसरात कार्यक्रमाबाबत उत्सुकता निर्माण झाली आहे.
