एक मत गावाचे भविष्य ठरवते; विकासाच्या बाजूने उभे रहा — सरपंच सागर अभंग

विडणी (आपलं फलटण)आपले एक मत गावाचे भविष्य ठरवणारे आहे.ते वाया घालवू नका.मत देताना केवळ व्यक्ती नव्हे, तर विकासाची दिशा लक्षात ठेवा.सकारात्मक विचार करून निर्णय घ्या आणि विकासाच्या प्रवाहात सहभागी व्हा.
ग्रामपंचायत पोटनिवडणुकीच्या पार्श्वभूमीवर विडणी ग्रामपंचायतीचे लोकनियुक्त सरपंच सागर अभंग यांनी ग्रामस्थांना विकासाच्या मुद्द्यावर एकजूट होण्याचे आणि सजग मतदान करण्याचे आवाहन केले आहे.

मंगळवार, दि. २८ एप्रिल २०२६ रोजी होणाऱ्या या निवडणुकीत विडणी विकास आघाडीच्या सर्व उमेदवारांना प्रचंड बहुमताने विजयी करा अशी भावनिक सादही त्यांनी घातली
गत तीन-साडेतीन वर्षांत गावात झालेल्या विकासकामांचा उल्लेख करताना अभंग म्हणाले की, ग्रामस्थांच्या सहकार्यामुळे विडणीमध्ये विकासाची नवे पर्व उभे राहिले आहे. रस्ते, पाणीपुरवठा, स्वच्छता, तसेच विविध मूलभूत सुविधांच्या उभारणीमुळे गावाचे रूप पालटत आहे. अनेक वर्षे प्रलंबित असलेले प्रश्न मार्गी लावण्याचे काम आपण हाती घेतले आणि त्यात यशही मिळवले.
ज्यांच्या हाती अनेक दशकं सत्ता होती, त्यांनी गावाच्या विकासासाठी अपेक्षित पावले उचलली नाहीत. त्यामुळे गावाचा विकासाचा वेग मंदावला. मात्र, आता परिस्थिती बदलली असून ग्रामस्थांच्या विश्वासामुळे विकासाची गंगा विडणीमध्ये वाहू लागली आहे.
सध्याच्या राजकीय व प्रशासकीय पाठबळाचा उल्लेख करताना त्यांनी सांगितले की, गावाच्या पाठीशी स्थानिक स्वराज्य संस्थांपासून ते राज्य व केंद्र सरकारपर्यंत मजबूत साथ उभी आहे. ग्रामविकास मंत्री जयकुमार गोरे यांचे मार्गदर्शन लाभत असल्यामुळे विकासकामांना अधिक वेग मिळत असल्याचे त्यांनी नमूद केले.
याच पार्श्वभूमीवर मतदारांना उद्देशून त्यांनी भावनिक आणि ठाम शब्दांत संदेश दिला —
“आपले एक मत गावाचे भविष्य ठरवणारे आहे.
ते वाया घालवू नका.
मत देताना केवळ व्यक्ती नव्हे, तर विकासाची दिशा लक्षात ठेवा.
सकारात्मक विचार करून निर्णय घ्या आणि विकासाच्या प्रवाहात सहभागी व्हा.”
या शब्दांत त्यांनी ग्रामस्थांना सजग मतदानाची आवश्यकता पटवून दिली.
ते पुढे म्हणाले, सुरू असलेली विकासकामे थांबू नयेत, उर्वरित प्रश्न मार्गी लागावेत आणि गावाचा सर्वांगीण उत्कर्ष साधावा, यासाठी सक्षम नेतृत्वाची निवड अत्यावश्यक आहे. त्यामुळे प्रत्येक मतदाराने जबाबदारीने मतदान करणे गरजेचे आहे
विडणीचे उज्ज्वल भविष्य घडवण्यासाठी आपण सर्वांनी एकत्र येणे आवश्यक आहे. विकासाच्या या प्रवासात साथ द्या आणि विडणी विकास आघाडीच्या सर्व उमेदवारांना भरघोस मतांनी विजयी करा.
ग्रामपंचायत पोटनिवडणूक ही केवळ राजकीय स्पर्धा नसून गावाच्या भवितव्याचा निर्णायक टप्पा ठरणार असून, या पार्श्वभूमीवर विडणीमध्ये निवडणुकीची रंगत वाढताना दिसत आहे.